Vieiros

O xoves 20 preséntase en Compostela, na sede da Fundación Caixa Galicia, Urco Editora, un proxecto editorial pioneiro en Galiza, que aposta pola cultura libre e o software de código aberto. Segundo anuncia na súa web a empresa, todo o proceso de edición faise exclusivamente baixo o sistema operativo GNU/Linux e con programas de código aberto.

Os responsábeis de Urco afirman que o mundo editorial precisa dunha constante innovación e o Software Libre non só permite esta evolución constante senón que obriga a unha permanente renovación. Ademais, evítase o gasto en licenzas.

Urco Editora funciona co sistema operativo Ubuntu, e emprega os programas Gimp e Inkscape para o deseño, Scribus para a maquetación e OpenOffice.org para a redacción. A editora publicará baixo licenzas Creative Commons todas as traducións de textos sen dereitos, por considerar "absurdo, pouco ético e regresivo" usar licenzas restritivas en obras que xa quedaron libres do copyright.

A liña editorial do novo proxecto centrarase na literatura fantástica, a ciencia-ficción e o terror, e principalmente en clásicos, con autores como Lovecraft, H.G. Wells ou Edgar Allan Poe. Precisamente este último abrirá a colección Gótica, cunha edición bilingüe e ilustrada d'O corvo, que se dará a coñecer o mesmo día da presentación da editora.