Vieiros

Vieiros de meu Perfil


Edición xeral

RSS de Edición xeral
SEMANA VERDE

O 'escaparate agrogandeiro' vive das oposicións que celebra a Xunta

Socialistas e nacionalistas non se dan posto dacordo para mudar o rumbo dun recinto feiral que leva anos en crise.

R.Vilar - 12:30 20/12/2007
Oposicións da Xunta na Semana Verde

Oposicións da Xunta na Semana Verde

A situación da Semana Verde de Galicia comeza a ser máis ca un problema para o bipartito. O principal escaparate do sector primario do país vive en coidados intensivos dende hai anos. A situación é tan delicada que as máis de 80 persoas que traballan nas instalacións coidan que a fundación pode entrar en suspensión de pagos nos vindeiros meses. Os propios operarios advirten que a creba aínda non se produciu grazas aos cartos que reportan as oposicións que a Xunta celebra a miúdo no recinto silledense.

A redefinición do macrorecinto é inaprazábel, logo de dous anos e medio no Goberno, socialistas e nacionalistas aínda non chegaron a un acordo para sacarlle rendibilidade a unhas instalacións que tiñan que servir de espello do sector agro-gandeiro e forestal. Os problemas arrástranse dende hai anos. Tal e como xa revelaramos, o anterior executivo do PPdeG gastou, con escaso criterio, máis de 60 millóns de euros só na década dos 90 en apoiar o recinto. Os representantes dos traballadores cren que é escandaloso os escasos mecanismos de control sobre o diñeiro público que se destinou á Semana Verde.

O bipartito atopou varios problemas ao chegar ao poder. Un é o sempiterno presidente da Semana Verde, Xosé Maril. Aínda que para moitos foi a 'alma mater' do proxecto durante anos, dende hai tempo é considerado un atranco para o mesmo. Maril, que cobra 105 mil euros brutos anuais, pode ter os meses contados. Logo de moito tempo gozando dunha blindaxe, dende finais de novembro depende do que decida o Padroado da Semana Verde, que ten 17 membros: 9 da Xunta; 5 a Asociación Feiral (controlada por Maril); 1 da Cámara de Comercio e outro en representación do Concello de Silleda.

Pero que impide que se endereite o rumbo?
Mais mentres o bipartito segue sen saber como abordar o problema, Maril busca xeitos de manterse na presidencia entrevistándose tanto con socialistas como con nacionalistas. A súa xogada política foi arriscada hai meses, o seu nome incluso chegou a sonar con forza como candidato á alcaldía de Silleda e tivo negociacións coa dirección dos socialistas pontevedreses. Finalmente, o PSdeG apostou por unha cara nova, Paula Fernández, que conseguiu acceder a unha alcaldía con tradición conservadora.

En teoría, a Xunta podería desfacerse de Xosé Maril e virar o barco da Semana Verde en calquera momento. Mais o problema é moito máis complexo e aféctalle directamente á Consellaría de Presidencia e á de Medio Rural. Aínda que o lóxico tería sido que o departamento de Suárez Canal tivera a última palabra, na praxe o de Méndez Romeu é o que mantén o peso específico. Dos nove representantes do Goberno na Semana Verde seis están relacionados con áreas socialistas e tres coas nacionalistas. O poder dos socialistas é aínda un pouco maior se se ten en conta que o Concello de Silleda, que posúe tamén un vocal, está gobernado polo PSdeG dende maio.

Negociación complicada
Mais o problema é tamén de fondo, o bipartito negociou hai xa dous anos e medio o reparto de responsabilidade de goberno. O lóxico é que os socialistas lle acaben cedendo a Medio Rural o protagonismo na Semana Verde. Mais no taboleiro político o PSdeG tamén quere algo a cambio desta cesión: o Sistema de Información Xeográfica de Parcelas Agrícolas (SixPac), que pasaría a mans de Política Territorial. Os nacionalistas non están dispostos a negociar unha ferramenta crucial para levar adiante o Banco de Terras.

Mentres que non chegan solucións, os traballadores da Semana Verde seguen a dicir que en calquera momento poden quedar sen nómina, algo que nega o presidente. Este mércores celebraron eleccións sindicais. A CIG conseguiu a maioría absoluta dos votos e dous dos tres delegados. Unha das representantes desta central Maria do Carme Midón aseguráballe a Vieiros que, polas características do recinto, o lóxico sería que Medio Rural e Innovación e Industria tiveran máis que dicir no futuro da Semana Verde. Agora queda por ver se o bipartito vai ser capaz de reflotar un barco que leva máis dunha década afundindo, logo de tragar inxentes cantidades de diñeiro público.


4,83/5 (12 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Xosé Maril, presidente da Semana Verde
Xosé Maril, presidente da Semana Verde
Oposicións no recinto da Semana Verde
Oposicións no recinto da Semana Verde
Maril, co conselleiro da Presidencia, Xosé Luís Méndez Romeu
Maril, co conselleiro da Presidencia, Xosé Luís Méndez Romeu
Maril, co conselleiro de Medio Rural, Alfredo Suárez Canal
Maril, co conselleiro de Medio Rural, Alfredo Suárez Canal