Vieiros

Vieiros de meu Perfil


Edición xeral

RSS de Edición xeral
Recadación estimada de 5.100 millóns para 2008

Cataluña afonda no control dos impostos que pagan os seus cidadáns

Ponse en marcha a Axencia Tributaria catalá, unha das primeiras entidades propias contempladas no Estatuto que bota a andar.

Redacción - 17:00 03/01/2008
O presidente da Generalitat, José Montilla

O presidente da Generalitat, José Montilla

Esta cuarta feira botou a andar a Axencia Tributaria de Cataluña, un organismo que debe xestionar os impostos propios da Generalitat, e os que o goberno español lles cedeu completamente. É un dos primeiros instrumentos contemplados no novo Estatuto Catalán que xa comezou a traballar.

A axencia, presidida polo secretario xeral do Departamento de Economía, Martí Carnicer, ten un orzamento de 32 millóns de euros para o 2008, ocupa a 347 traballadores e ten pretendido xestionar máis de 5 millóns de euros en tributos o ano do seu nacemento.

Unha vez constituída, a Axencia debe formar un consorcio coa súa homónima estatal, que se vai encargar de xestionar os impostos compartidos polas dúas administracións.

Os impostos xestionados pola nova Axencia catalá
A Axencia Tributaria de Cataluña vai controlar o imposto sobre grandes estabelecementos comerciais e o gravame de protección civil da Generalitat; tamén o imposto de sucesións e doazóns, o de patrimonio, o de transmisións patrimoniais e de actos xurídicos documentados e as taxas sobre o xogo, cedidos polo Estado Español.

Unha recadación de 5.100 millóns de euros para o país

Todos estes cartos son os que o presidente da Generalitat, José Montilla, ten pensado recadar coa nova Axencia este ano. Para Montilla a creación desta entidade é o primeiro paso para conseguir o "despacho único" para Cataluña.

O presidente catalán tamén dixo estar seguro de que a nova Axencia vai cumprir os obxectivos estatutarios "tanto en materia tributaria como en financiamento". Montilla terminou a súa intervención lembrando que "estamos a fortalecer o autogoberno e estamos a facer Estado cunha Generalitat que respecta o marco constitucional e que coopera con outras institucións".

Críticas da oposición á Axencia e ao Estatuto
O voceiro do PP no Parlamento catalán, Carina Mejías, cualificou de "novo desafío do tripartito" catalán a apertura da ATC, reclamando que non se desenvolvan os artigos do Estatuto, contra os que recorreu o seu partido (están á espera dun dictame do Constitucional).

CiU xustificou a súa ausencia da presentación da entidade argumentando que é só "un cambio de rótulo da antiga dirección xeral de Tributos que non vai afectar os cidadáns".


Ligazóns

0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: