Vieiros

Vieiros de meu Perfil


Edición xeral

RSS de Edición xeral
Primeiro "Pacto Territorial de Emprego"

A Costa da Morte, na procura da voz propia para saír da poza

O proxecto agora iniciado promete darlles voz aos axentes socio-económicos de cada comarca para deseñaren iniciativas de creación de emprego axustadas ás súas necesidades.

Redacción - 12:45 14/01/2008

Gobernos municipais, sindicatos ou empresarios locais terán maior manobra este ano na Costa da Morte para debateren e deseñaren as iniciativas que no ámbito das políticas de emprego consideren máis axeitadas para os seus concellos e comarcas. É unha das ideas xurdidas do Pacto de Emprego, que tratará de axustar máis ao contorno os investimentos do Goberno neste ámbito.

Está por ver como funciona na práctica a idea. Ao fío, os veciños de Muxía, na propia Costa da Morte, deran exemplo non hai moito de seren capaces de presentar un proxecto alternativo á piscifactoría que invadirá as Brañas de Merexo. Unha alternativa dos veciños baseada na confianza no potencial agroturístico da zona e que de momento non foi quen de tumbar o proxecto acuícola.

Alto paro feminino e elevada temporalidade
O conxunto dos concellos da Costa da Morte suman unha media de arredor de 10 mil persoas nas listas do paro, en concreto 8.593 desempregados o último ano. Do total, o 64% son mulleres. Ademais, dous de cada dez mozos menores de trinta anos non teñen traballo.

Malia que nos dous últimos anos houbo unha redución de 2.013 parados, e que nese mesmo período rexistráronse até 3.348 novos afiliados á Seguridade Social, un 10% de incremento, segue habendo unha baixa porcentaxe de contratos indefinidos. Así, de cada cen contratos asinados, só 14 son de tipo indefinido.


Proxecto experimental
A comarca da Costa da Morte é unha das primeiras onde se vai poñer en marcha o chamado "Pacto Territorial de Emprego". A Xunta destinará este ano 2,5 millóns de euros para este e os outros catorce similares. Xunto coa Costa da Morte, as comarcas de Lugo, a do Salnés e a de Valdeorras serán as primeiras onde funcionará como experiencia piloto. O resto: Barbanza, A Coruña, Ferrol, Santiago, Lemos, A Mariña, Limia, Ourense, Valdeorras, Deza-Tabeirós, Pontevedra e Vigo.

O Pacto Territorial de Emprego da Costa da Morte presentouse na mañá deste luns, nun acto onde participaron o conselleiro de Traballo, Ricardo Varela, o alcalde de Carballo, Evencio Ferreiro; o secretario xeral da Unión Comarcal de CCOO da Coruña, Xosé Manuel Lado Lestón; o secretario xeral da Unión Comarcal de UGT-Galicia da Coruña, Xosé Carrillo Souto; e o membro da Comisión Executiva da Confederación de Empresarios da Coruña, Juan Manuel Cancela Sánchez.

Afinando máis na estratexia de revitalización
O proxecto chega apenas un mes despois da presentación do Plan de Dinamización da Costa da Morte, baseado en tres puntos: o impulso das infraestruturas, a mellora do capital humano e a dinamización económica, un paquete de medidas plurianual de 524 millóns que suporá un investimento por persoa de 3.586 euros.

A iniciativa estrela do Plan é o novo corredor da Costa da Morte, unha estrada de alta capacidade que atravesará as bisbarras de Bergantiños, Soneira e Fisterra e na que se investirán 300 millóns de euros co obxectivo de que estea rematada en 2010.


5/5 (1 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: