Vieiros

O grupo municipal do BNG pediulle ao Concello de Ferrol que tramite ante o Ministerio de Defensa a cesión da chamada Casa do Coronel, un predio do antigo Cuartel Sánchez Aguilera para que poida acoller o museo da Sociedade Galega de Historia Natural (SGHN).

Cómpre que o Concello cubra unha instancia e a presente ante Defensa. Porén, segundo o voceiro do BNG, Xoán Xosé Pita, o bipartito ferrolán vai moi atrasado na tramitación do permiso, xa que o goberno español aínda non recibiu ningunha petición para que a SGHN se instale a instalación nos terreos do vello cuartel.

A xuízo do BNG, o concello está a demorar a petición porque prefire realizar unha nova proposta de usos do inmóbel. Os nacionalistas presentaran unha moción -aprobada en pleno municipal- para que a SGHN fose reubicada neste lugar xa que o actual, o vello edificio do Hospicio, está moi deteriorado.

Na súa web, os membros da Sociedade definían así, no mes de outubro pasado, o estado do predio no que agora están: "ante a ameaza doutro inverno de chuvias, é máis que probábel que teñamos que continuar no vello edificio do Hospicio onde naceu e creceu a nosa colección, cheo de humidades e coa ameaza constante de chegar a realizar o noso labor co ceo como testemuña".

O Hospicio xa ten novos inquilinos
Hai un mes o Concello de Ferrol anunciaba a remodelación das instalacións do vello Hospicio e a súa posterior cesión á Asociación de Empresarios de Hostalería de Ferrol e comarca para montar un centro de formación. Segundo o delegado da SGHN, Xoán Ignacio Dasilva, estaba previsto que as obras de remodelación da Casa do Coronel comezasen o pasado 2 de xaneiro.