Vieiros

Herdeiros da vizosa experiencia da Burla Negra, a Rede de Acción Socio-Cultural Arredemo, renace con forza para axitar conciencias e propoñer respostas. Para o impulso desta nova etapa, e ao xeito do que se fixera hai xa máis de catro anos convócase o bautizado coma Foro Negro. Unha xuntanza que quere ser "punto de encontro, reflexión, debate e denuncia das outras tantas agresións que estamos a padecer no social, no ambiental, no político e no cultural".

Ese día agardamos coñecer as novas propostas de Arredemo, que no contexto de internet, prepara un multiblog de edición aberta, libre distribución e outros recursos ao servizo do tecido socio-cultural galego. Ao fío, convidan a participar a todo tipo de persoas e colectivos no mantemento do que quere ser un punto de encontro comunicativo "libre e independente".

E non por casualidade, a reunión será no Instituto Galego de Información, e a poucos días do afastamento definitivo de Isaac Díaz Pardo da dirección do grupo Sargadelos. A convocatoria é para este sábado 19. Durante o acto, vaise presentar o número cero do bautizado "Xornal Galicia", reflexión colectiva e análise da situación social e cultural do país.