Vieiros

Comeza a quinta edición do festival Sons da Diversidade e desta vez faino con folk. Os irlandeses Moving Hearts, revolucionadores do folk dos 80, chegan agora a Compostela para interpretar ante o público galego os temas que cativaron a persoas de todo o mundo grazas á súa mestura da música tradicional irlandesa, jazz, rock ou funk.

O grupo formado por Christy Moore, Donal Lunny, Eoghan O'Neill, Brian Calnan, Davy Spillane e Keith Donalds, sentaron as bases dun potente son irlandés, valorado polas súas letras de explícito compromiso político e centradas especialmente na situación de Irlanda do Norte. Tras a súa separación, agora volven a tocar xuntos, e Compostela é unha das paradas nas que o “dream team” da música irlandesa fará para explotar as posibilidades do seu son único.

Aquí podemos ver un anaco do concerto que ofrecenron en Dublín:

Seis meses de música

O programa de Sons da Diversidade continúa en febreiro coa participación da cantante alemá Ute Lemper, que tras pasar o ano pasado co seu Cabaret pola Coruña, chega agora a Compostela para facer un repaso de todo o seu repertorio. O 15 de marzo tócalle a quenda a unha artista galega. Tras 20 anos de carreira artística, Uxía converteuse co seu estilo intimista nunha das voces máis populares do noso país.

Tom Zé achegaranos o 13 de abril o seu vangardismo sonoro, poesía e compromiso co seu Danç-Êh-Sá-Dança dos Herdeiros do Sacrificio, mentres que en maio será a polifacética Laurie Anderson a encargada de transmitir o seu magnetismo aos espectadores que acudan a ver o seu espectáculo Homeland. Xa por último, pecha o ciclo o rei do Pop Barroco, Rufus Wainwright, que coa súa ironía, ego e exhibicionismo a corazón aberto, ademais da súa orgullosa condición de icona gay, fortalecen o seu status de artista á marxe de todo.