Vieiros

Mentres abrollan á prensa económica os ruxerruxes sobre o futuro inmediato de Unión Fenosa, que podería pasar por unha fusión para a que xorden varias posíbeis noivas, as entidades financeiras galegas encheron petos esta semana a conta da boa evolución bolseira da eléctrica.

O primeiro foi o Banco Pastor, do que se coñecía a venda dun 1,14% que lle proporcionaba ingresos brutos de até 110 millóns de euros. Con todo, esa operación deixaba á que fora entidade clave na fundación da empresa eléctrica con só o 1,86% do capital de Fenosa.

E este xoves, chegaba comunicación de que Caixa Galicia reduce dun 10 a un 5% a súa participación na eléctrica. Trátase dunha serie de desinvestimentos que se terían realizado ao longo de todo 2007 e que sumaron a venda de até 15,23 millóns de accións, un volume que, comparado cos prezos desta mesma semana, implicaría ingresos para a caixa de arredor de 682 millóns de euros. Con todo, e segundo lle indicaron a Europa Press fontes de Caixa Galicia, a entidade ten o compromiso de "manterse no capital de Unión Fenosa".