Vieiros

Vieiros de meu Perfil


Edición xeral

RSS de Edición xeral
ALLARIZ DIXITAL

Allariz convértese na "vangarda galega" da Sociedade da Información

Anxo Quintana presenta un proxecto de impulso ás novas tecnoloxías no concello ourensán, mediante a interconexión, a administración electrónica e a alfabetización dixital.

Redacción - 17:19 06/02/2008
O alcalde de Allariz, Francisco García, e o vicepresidente da Xunta amosan a tarxeta de acceso a Allariz Dixital / Concello de Allariz

O alcalde de Allariz, Francisco García, e o vicepresidente da Xunta amosan a tarxeta de acceso a Allariz Dixital / Concello de Allariz

O proxecto Allariz Dixital, presentado este mércores, pretende converter o concello ourensán no impulsor da Sociedade da Información no país.

O vicepresidente da Xunta, Anxo Quintana, encargado de dar a coñecer a iniciativa, asegurou que o proxecto converterá Allariz nun "referente de políticas ambiciosas desenvolvidas localmente con aspiración global" para "seguir á vangarda galega".

O programa, que segue as indicacións do Plan Galego da Sociedade da Información, desenvolverá estratexias a todos os niveis para introducir o conxunto da poboación nas novas tecnoloxías da comunicación e romper as desigualdades entre o rural e o urbano. Así, incidirá en tres liñas estratéxicas: a conectividade, a administración electrónica e a alfabetización dixital.

Para acadar o primeiro obxectivo, poñerase en marcha unha malla de comunicación entre a vila e as parroquias a través dos centros sociais como intermediarios para o acceso aos servizos de interese xeral. Nunha primeira fase, conectaranse 6 centros mediante unha rede sen fíos, que se irá estendendo a todo o concello. Tamén se instalará un servizo de información específico: un circuíto interno de televisión nos telecentros e locais sociais coa actualidade sobre a vida social, cultural e política do municipio. Ademais, desenvolveranse accións orientadas á mocidade como colectivo impulsor das novas tecnoloxías.

A segunda liña estratéxica, a administración electrónica, poñerase en marcha mediante un sistema de acceso aos servizos municipais por medio dunha tarxeta. Isto permitirá reducir os tempos de tramitación e ofrecer servizos accesíbeis, transparentes e atención en tempo real.

Por último, pénsase avanzar na alfabetización dixital con contidos nas aulas municipais e mais nunha aula móbil que percorrerá as parroquias.

Unha das iniciativas que máis destacou Quintana foi a busca de achegamento ás novas tecnoloxías a través do intercambio xeracional. Os netos e netas, baixo a titorización de persoas expertas, converteranse en embaixadores formativos dos seus avós.


5/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: