Vieiros

Mondosonoro, unha das publicacións especializadas en música máis populares, organiza todos os anos as Festas Demoscópicas, que en cada comunidade autónoma buscan novos talentos. Nesta ocasión Moondogs Blues Party, Portrait e Telémaco son as bandas convidadas, nun concerto que terá lugar na sala Capitol de Compostela este xoves, con entrada de balde.

Comezará o concerto o blues de Moondogs Blues Party, que vén de representar a Galiza en Canne, no stand que o IGAEM colocou no Mídem. O seu álbum O cadelo lunático pode descargarse de balde na Regueifa Plataforma. Actualmente a banda está composta por Javier Prado (guitarra e voz), Kevin Traba (batería), Javier Campello (guitarra e voz), Iria Novo (baixo), Klaus Martin (trompeta) e Alicia Val (frauta traveseira).

A seguir, actuarán os vigueses Portrait, unha banda formada en 2005 a partir dunha base de catautor folk que deu lugar ao EP Self. Dende entón o grupo foi engadindo compoñentes e instrumentos, enriquecendo o seu son e achegándoo ao pop-rock. O pasado verán actuaron no Lolapop de Pontecaldelas.

Pecharán a noite os lucenses Telémaco, unha conxunción de música electrónica, jazz, ambient e outros estilos. Teñen xa dous discos editados, Outótono Aire (2005) e Terra (2007), e nos vindeiros meses publicarán o seu terceiro traballo, Auga.