Vieiros

Vieiros de meu Perfil


RSS de
Polo dereito a recibir e a emitir información

Os xornalistas levan ao Tribunal Supremo un recurso sobre os bloques electorais

Preséntano contra a Xunta Electoral Central, por non facer por "separar a información da propaganda" e por impoñer tempos fixos para os bloques electorais en RTVE.

Redacción - 18:30 21/02/2008

O Col.legi de Periodistes de Catalunya, a Asociación de Prensa de Madrid e o Colexio Profesional de Xornalistas de Galicia (CPXG) van presentar un recurso legal ante o Tribunal Supremo contra a resolución da Xunta Electoral Central (XEC).

A dita resolución obriga aos profesionais de RTVE a "modificar a súa cobertura" electoral e aplicar diariamente a proporción de espazos ofrecidos aos partidos en función da representatividade conseguida por cada un deles nas eleccións de 2004.

Contra a propaganda "disfrazada de información"
A través dun comunicado, o CPXG denunciou que a práctica de incluír, por imperativo legal, actos de propaganda política como noticias dentro dos espazos informativos "vai en contra da obriga democrática de separar a información da opinión e da propaganda". Tamén critica que a imposición de tempos fixos para os bloques electorais supón a "deturpación do dereito á información".

No mesmo sentido, o CPXG reclama "unha vez máis a democratización e profesionalización das televisións públicas", que ven como un "instrumento básico para a formación do sentido do voto nunha campaña electoral". Alén disto, os xornalistas galegos denuncian o "paradoxo" de que a Xunta Electoral Central obrigue ás televisións públicas a emitir como información mensaxes partidarias de campaña, e non lles garanta aos cidadáns "o acceso aos debates entre os principais candidatos a través das televisións que deben ser de todos".

Tamén a Asociación de Prensa de Madrid e o Col.legi de Periodistes de Catalunya uniron as súas voces á galega, na redacción e presentación deste recurso, que se presentará a vindeira quinta feira no TS. As tres asociacións de xornalistas consideraron que a cousa vai ir adiante, amparada no dereito a recibir e emitir información, no pluralismo e a neutralidade informativa.


4,2/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: