Vieiros

A violencia machista entrou esta semana na campaña electoral, despois de que o martes catro mulleres morresen asasinadas no estado polos seus maridos, e de que o mércores dúas máis fosen acoiteladas. Zapatero prometeu que se gaña os comicios do 9 de marzo convocará a Conferencia de Presidentes Autonómicos "extraordinaria e urxente" para analizar o problema e procurar solucións. Pola súa banda, Rajoy tratou o tema nun mitin por vez primeira en toda a campaña.

En Galiza, a prosposta do candidato socialista foi ben recibida tanto por Emilio Pérez Touriño como por Anxo Quintana. Touriño Touriño cualificou a violencia machista de "auténtica lacra" e valorou a importancia da reunión como unha oportunidade de "sumar esforzos". Así mesmo salientou a importancia da Conferencia de Presidentes e resaltou que o órgano "dálle oportunidade a Galiza de tomar decisións que afectan aos cidadáns en positivo".

Mentres, Quintana considerou "positiva" a convocatoria e reclamou "non caer na autocomplacencia" nesta cuestión. O vicepresidente da Xunta lembrou que se trata dun "problema estrutural" cuxa solución "leva tempo".