Vieiros

A tensión electoral tamén chegou este sábado ao Feirón de Arteixo, ao achegarse a policía local ao posto que tiñan instalado os candidatos populares do concello, no que estaban a repartir propagando do seu partido.

Os axentes foron cara a mesa do PPdeG por orde da alcaldesa, Pilar Souto (PSdeG), cousa que provocou a indignación do ex rexedor local, Manuel Pose (PPdeG) e dos seus compañeiros de partido, que abandonaron o posto.

Avisados por non "cumprir as normas"
Segundo publica o xornal La Opinión, a seguir chegou un cruce de acusacións no que o líder dos populares de Arteixo enmarcaba a chegada da policía local nun "non saber estar" da alcaldesa e acusouna impedir un acto electoral "para o que o PP tiña solicitado autorización o pasado 14 de febreiro", segundo dixo Pose.

Polo seu lado Pilar Souto dixo que Pose tiña "moita cara" mais recoñeceu que o PP tiña solicitado o permiso para instalar o seu posto, e que se lle concedera para dúas mesas, e non para as nove que tentaban poñer. Para Souto o sitio que collían sobrepasaba "moito" as dimensións fixadas no permiso municipal.

Pese a todo, a alcaldesa puntualizou que non lles tiña dado aos axentes a orde de suspender o acto, mais si de que lles lembrasen aos populares que estaban a incumprir as normas, polas que foran denunciados, segundo dixo Souto, por varios veciños.