Vieiros

Por causa do vento, os ciclistas tomaron a decisión de facer os primeiros trinta quilómetros, ata a ascensión ao alto de Ricote, a ritmo tranquilo para non correr riscos innecesarios. No descenso do porto saltou do pelotón o ciclista do Karpin Galicia Gustavo Domínguez, en compañía de Redondo (Andalucía-Cajasur) e Azanza (Contentpolis-Murcia). O trío, que chegou a contar cunha vantaxe máxima de catro minutos e medio, foi neutralizado ao pé do alto de Espuña, despois de ter cuberto uns cincuenta quilómetros en fuga.

Mosquera, un dos corredores máis fortes da rolda
A ascensión encadeada dos portos de Espuña e Collado Bermejo deixou en cabeza unha selección dos corredores máis fortes da carreira, con Contador, Valverde, Garzelli e Ezequiel Mosquera, entre outros.

O galego, ao igual que o seu compañeiro de equipo Mayoz, estivera con problemas de gastroenterites durante a noite anterior, pero aínda así, a uns catro quilómetros do cume de Collado Bermejo, lanzou un ataque para marcharse en solitario e reducir o grupo perseguidor a só cinco unidades. O quinteto deu caza ao ciclista do KGZ a piques de coroar o porto e, no longo descenso até a meta en Totana, outros seis corredores enlazarían coa cabeza para formar o grupo de doce unidades que se disputou a etapa e o liderado, recaendo en Rubiera e Aitor Pérez, respectivamente.

Na xeral, Ezequiel Mosquera é noveno, a seis segundos do líder. Esta quinta feira dispútase a terceira etapa entre as localidades da costa mediterránea de Puerto Lumbreras e San Pedro del Pinatar, de 146 quilómetros.