Vieiros

Fontes socialistas identificárono como Isaías Carrasco Miguel, de 42 anos de idade, quen fora un dos dous concelleiros do PSOE en Arrasate na anterior lexislatura. Fora na lista do PSOE no sexto lugar nos últimos comicios municipais. Na actualidade estaba retirado da primeira liña da actividade política e renunciara a levar escolta. Traballaba en Bidelan, a empresa que xestiona a autoestrada A8 en Euskadi.

Segundo as primeiras informacións recibiu catro tiros na caluga á porta da súa casa en Arrasate. Un testemuño recollido pola canle CNN+ no lugar asegura que Isaías Carrasco estaba nese momento en compañía da súa muller e da súa filla. Algunhas testemuñas presentes afirman que un individuo con barba postiza, presumibelmente membro de ETA, foi o autor material do asasinato. Unha segunda persoa agardaba por el no interior dun coche en marcha.

Malia que nun primeiro momento se comunicara que faleceu camiño do hospital, posteriormente o departamento vasco de Interior informou de que chegara vivo ao centro hospitalario, aínda que os médicos nada puideron facer para salvar a súa vida. Pouco despois das 15h certificouse oficialmente a morte do ex concelleiro.

• Pérez Touriño expresa "a máis enérxica repulsa do pobo galego" fronte ao acontecido
• Anxo Quintana: "Onde estea Galiza, haberá unha condena á acción criminal da ETA"
• Núñez Feijoo: "Cada día, ETA ten o mesmo na súa axenda: asasinar"
• Declaracións dos presidentes vasco, Ibarretxe, e español, Zapatero
• O PP ensombrece a unanimidade dos grupos políticos (Texto consensuado no Congreso)
• Máis reaccións: Comunicado oficial PSdeG; Miguel Buen (PSE); Jokin Bildarratz (Eudel-Concellos Euskadi); Jon Abril (Aralar); Mariano Rajoy (PP)
• Os partidos acordan suspender a campaña
• A alcaldesa de Arrasate e outros tres concelleiros de ANV acoden ao hospital
• Todos os partidos de Arrasate, agás ANV que se abstivo, condenan o asasinato

• Máis información na prensa vasca: EiTB24, Deia, Berria, Gara, El Correo, El Diario Vasco