Vieiros

Vieiros de meu Perfil


Máis Alá

Xestionado por Vieiros
RSS de Máis Alá
SEMANA GALEGA DA FILOSOFÍA

Evolución vs. deseño intelixente en Pontevedra

Unha conferencia do biólogo Francisco J. Ayala será o máis destacado desta xornada, na que tamén intervirán Anxo Carracedo e Ramón Villares.

Redacción - 09:00 26/03/2008

O máis destacado da segunda xeira da Semana Galega de Filosofía foi a intervención do filósofo Javier Muguerza, que falou sobre "Os rostros da igualdade na cultura política contemporánea" na derradeira conferencia da tarde. O autor andaluz manifestou que "se fala tanto de igualdade hogano porque escasea e a igualdade, como as utopías, son desexos insatisfeitos. A utopía non se acadará nunca pero paga a pena loitar por ela, pola paz e a xustiza, xa que a loita pola utopía é a loita polos dereitos humanos". Muguerza ten sido definido como o filósofo da disidencia, pola súa persoal visión da ética: "non nego que o consenso sexa desexable, para conquerir leis e dereitos é fundamental, pero non debemos esquecer que foron conquistados polos disidentes, xa que os do consenso non llelos permitían.

Este martes, ademais, afondou no camiño que traza o pensamento sobre a utopía. O catedrático de Filosofía da Autónoma de Madrid, Félix Duque, ofreceu o relatorio "Defensa da razón transversal". Pola tarde, a actual subdirectora do Plan Galego de I+D+i, Xulia Guntín, leu conferencia titulada "Ciencia e tecnoloxía en Galiza: presente e futuro", coa que repasou o estado actual das propostas políticas neste eido e a súa proxeción cara aos anos vindeiros.

Francisco Ayala
Na terceira xornada da Semana, destaca a achega do biólogo Francisco J. Ayala, que falará sobre Evolución e deseño intelixente: da realidade á utopía. Ayala, que vive nos Estados Unidos dende 1961, é profesor de Ciencias Biolóxicas na Universidade de California, onde acadou numerosos recoñecementos, a Medalla Nacional de Ciencia dos Estados Unidos; foi ademais Presidente da American Association for the Advancement of Science.

É autor de máis de 900 artigos e máis de 30 libros, entre os que se contan, en español, Darwin y el Diseño Inteligente (2007), La evolución de un evolucionista (2006), La piedra que se volvió palabra (2006), De Darwin al DNA y el origen de la humanidad (2002), Senderos de la evolución humana (2001) ou El método en las ciencias (1998). Ayala é doutor honoris causa nunha vintena de universidades de todo o mundo.

As súas investigacións científicas están dedicadas á xenética de poboacións e á evolución biolóxica, incluíndo a orixe das especies, a diversidade xenética dos organismos, a evolución da malaria, a estrutura xenética dos parásitos protozoarios, o reloxo molecular da evolución e a evolución humana. As súas publicacións filosóficas céntranse en epistemoloxía, ética e cuestións relacionadas coa bioloxía.

Programa para este mércores
10.30 a 13.00. Anxo Carracedo (USC). Xenética: Ética e filosofía
17.00 a 19.30. Ramón Villares (Presidente do Consello da Cultura Galega). Galiza como nación cultural.
20.00 a 22.00. Francisco Ayala (Biólogo). Evolución e deseño intelixente: da realidade á utopía.

Finalmente, ás 22.00 horas, o Teatro Principal de Pontevedra acollerá a montaxe Rebeldías posibles, da compañía madrileña Cuarta Pared.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: