Vieiros

Vieiros de meu Perfil


Máis Alá

Xestionado por Vieiros
RSS de Máis Alá
LEVOU 9 PREMIOS

'O neno de barro' fai pleno nos Mestre Mateo

A noite do cinema galego tivo un gañador claro; no Teatro Jofre de Ferrol o filme de Jorge Algora non deixou opcións aos outros candidatos.

Redacción - 09:18 16/04/2008

Un tras doutro O neno de barro foi recibindo premios. Estaba nominado en dezaseis candidaturas e levou nove, incluídas as de mellor filme, mellor director (Jorge Algora), mellor guión (Jorge Algora, Christian Busquier e Héctor Carré), mellor música orixinal (Nani García) e mellor actor protagonista (Chete Lera), ademais da meirande parte dos galardóns técnicos. Os outros filmes que optaban ás categorías principais tivéronse que conformar con un ou dous premios, destacando o premio á mellor actriz protagonista recibido por María Bouzas, por Unha muller invisible, e os galardóns ás interpretacións de reparto, que foron para Luis Zahera (Concursante) e Mabel Rivera (Hotel Tívoli).

Na categoría de televisión houbo tamén un dominador claro: Historias de Galicia fíxose cos premios ao mellor programa, mellor director (Ricardo Llovo) e mellor comunicador de TV (Xosé Barato). Ademais, Air Galicia obtivo o premio á 'mellor serie'.

No apartado de animación, Gritos en el pasillo gañou o premio á mellor longametraxe; e A flor máis grande do mundo o de mellor curtametraxe. Nas restantes categorías, Historia dunha parroquia (Bren Entertainment) foi elixido mellor documental do pasado ano; Cousas do Kulechov, de Susana Rey fíxose co premio na categoría de 'mellor obra experimental'; e Adeus Edrada?, de Rubén Riós o de mellor curtametraxe.

Noite de recoñecementos
Ademais dos gañadores nas 25 categorías, o polifacético actor Ernesto Chao, o que fora o primeiro Presidente da AGA, recolleu o Premio de Honra Fernando Rey. Esta é a primeira ocasión na historia da entidade na que este galardón recae nas mans dun actor.

Ademais, a Academia Galega do Audiovisual aproveitou a gran cita do ano para facerlles unha pequena homenaxe aos compañeiros falecidos nos últimos doce meses, a través da proxección dunhas imaxes nas que se lembraron as figuras de Pedro Amalio López (director e realizador de TV), Eduardo Díaz (redactor), Aquilino "Quino" González (cámara de TV), Emilio Mac Gregor (director-realizador), Agustín Díaz (redactor), Eugenio Pena (director e realizador de TV) e John Balan (artista).


Ligazóns

4.44/5 (9 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Un fotograma de 'O neno de barro'
Un fotograma de 'O neno de barro'
Jorge Algora, o gran triunfador da noite
Jorge Algora, o gran triunfador da noite
Ernesto Chao recibiu o premio de honra
Ernesto Chao recibiu o premio de honra
O Teatro Jofre de Ferrol encheuse na noite do cinema galego
O Teatro Jofre de Ferrol encheuse na noite do cinema galego