Vieiros

Vieiros de meu Perfil


Edición xeral

RSS de Edición xeral
En todas as comarcas de Pontevedra

Comezan as negociacións coa patronal do Transporte tras tres días de folga

A industria viuse afectada, especialmente Citroën, que este cuarta feira comezou a sacar os vehículos un a un para evitar os piquetes.

Redacción - 11:30 24/04/2008
A folga comezou o pasado luns ás 0.00 horas

A folga comezou o pasado luns ás 0.00 horas

Esta quinta feira, dende as 11.30 horas, sindicatos e patronal, coa mediación da Consellaría de Traballo, manteñen a súa primeira xuntanza para negociar unha saída ao conflito laboral no sector do Transporte de mercadorías en Pontevedra, que provocou que as principais centrais, UXT, CIG e CCOO, (con máis do 90% de representación) convocasen tres xornadas de folga.

O convenio colectivo -denuncian os representantes dos traballadores- é o cuarto peor do Estado. Xa que logo, reclaman melloras substanciais; en caso contrario o paro poderíase converter en indefinido a partir do 5 de maio, segundo o que se decida na asemblea que este sábado a partir das 12.00 horas terá lugar na Asociación de Veciños de Cabral.

Citroën, obrigado a sacar os coches un a un

A actividade industrial viuse gravemente afectada nestes tres días de folga. Concretamente, esta cuarta feira a factoría de Citroën, en Vigo, viuse na obriga de levar os coches un a un dende a cadea de montaxe, en Balaídos, deica a Bouzas para poder ser distribuídos ao mercado.

Operarios da propia planta industrial conduciron os vehículos -uns sesenta cada hora, sen matricular e escoltados pola Policía- polos cinco quilómetros que separan ambos os dous puntos, ante a imposibilidade por parte da empresa de utilizar os camións.

Cortes de tráfico

Ademais, ás 19.00 horas desta última xornada de paro, os traballadores concentráronse no nó de Isaac Peral, a pouco metros da sede da Confederación de Empresarios de Pontevedra, realizándose cortes de tráfico, que crearon un importante caos circulatorio no centro de Vigo.

Posteriormente, e vixiados en todo momento por un importante despregue policial, os operarios marcharon deica á rotonda de Guixar, onde pararon a actividade industrial do porto.


0/5 (0 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: