Vieiros

Vieiros de meu Perfil


Edición xeral

RSS de Edición xeral
DÍA DA LIBERDADE DE EXPRESIÓN

Alumnos de Comunicación amosan a súa repulsa á censura

No acto reivindicativo estiveron o Vicevaledor do Pobo e a xornalista Isabel Quintairos, despedida pola súa ideoloxía e a súa orientación sexual.

Redacción - 19:26 05/05/2008

Alumnos de Ciencias da Comunicación da USC pediron este luns respecto á liberdade de expresión en todos os eidos da vida, nun acto de conmemoración do Día Mundial da Liberdade de Expresión, que tivo lugar o sábado 3 de maio. Dous estudantes expresaron o seu respecto pola liberdade, acompañados do Vicevaledor primeiro, Xosé Xulio Fernández, e da xornalista Isabel Quintairos, despedida dunha emisora de radio pola súa condición sexual e política.

Os representantes do alumnado cualificaron a liberdade como algo propio das persoas e que todo o mundo debe reclamar, e chamaron a loitar contra a censura. Ademais, lembraron que este ano o Día da Liberdade de Expresión estivo relacionado coa China, país do que criticaron que estea a levar a cabo accións de censura, expulsión, tortura e encarceramento de xornalistas.

Pola súa banda, Isabel Quinteiros, cualificou de "inxustiza" a súa expulsión da COPE e incidiu na necesidade de crear asociacións para reivindicar os dereitos dos xornalistas, ao non existir aínda nin Lei de Prensa nin Estatuto dos xornalistas no Estado Español. Mentres, o vicevaledor primeiro do Valedor do Pobo destacou que a liberdade de expresión é un dereito "esencial" na Democracia e que hai que "loitar" para garantilo.

O acto pechouno o decano da facultade, Miguel Túñez, que indicou que o ano pasado 875 xornalistas foron arrestados en todo o mundo, dos que 127 foron encarcerados e 97 asasinados.


4.88/5 (8 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: