Vieiros

Vieiros de meu Perfil


Barcelona

Edición xestionada por Xabier Paradelo
RSS de Barcelona
SÁBADO 24 DE MAIO

A cultura galega dialoga en Barcelona con Marrocos e con Guinea-Bissau

O Maio Cultural Galego de Rede.cat convida ao diálogo con Marrocos nunha mesa redonda e con Guinea-Bissau nun espectáculo de humor e música.

Redacción - 18:00 21/05/2008

Dentro das diversas propostas do Maio Cultural Galego de 2008 e co gallo do Ano Europeo do Diálogo Cultural, Rede.cat promove diversas iniciativas. Entre elas, dou diálogos: unha mesa redonda sobre as relacións entre Galiza e Marrocos, no Centro Galego de Barcelona, e no Ateneu Popular de 9 Barris presentarase o espectáculo "Humor Neghro", no que comparten humor, teatro e música un galego e un guineano.

A mesa redonda "Galiza e Marrocos. Encontro na diferenza" xunta no Centro Galego de Barcelona á xornalista e filóloga hispánica Zoubaida El Fathi, directora e presentadora do Telediario español da Televisión Marroquí; a Valentín Carrera, xornalista, escritor, realizador e produtor audiovisual; e a Mohammed Chaib, deputado no Parlament de Catalunya e presidente da asociación socio-cultural Ibn Batuta.

Antes da mesa proxectarase un capítulo da serie "HANAN, de Galicia a Marruecos", dirixida por Valentín Carrera, director da promotora audiovisual Ibisatv, e realizada coa colaboración de Zoubaida El Fathi. A serie, que ten coma fío condutor unha nena galega de ascendencia bérber, Hanan, pretende xunguir os elementos humanos, económicos e culturais comúns entre Galiza e o norte de África (a pesca, o téxtil, a construción, a emigración...) para enfrontalos aos tópicos que separan os pobos.

Tomando coma punto de partida a proxección, os asistentes ofrecerán cadanseu punto de vista sobre a necesidade do diálogo entre diferentes comunidades.

O espectáculo de teatro e música "Humor Neghro", de Carlos Blanco e Manecas Costa, leva dende xaneiro percorrendo Galiza e tamén pasou por Portugal. Presentados por As Garotas da Ribeira, os artistas xuntarán no escenario o humor, a emigración e as diferenzas e similitudes das culturas que representan, Galiza e Guinea-Bissau, afastando tópicos e salientando o que as une: un mesmo xeito de ver a vida.

O polifacético artista galego Carlos Blanco, xornalista, humorista e actor, ten unha longa traxectoria que vai da radio e o teatro ao cine e á televisión. Actualmente compaxina a actividade teatral coa interpretación do Comisario Santoja na serie televisiva "El Comisario". O cantante de Guinea-Bissau Manecas Costa é un dos músicos de referencia no seu pais, do que foi nomeado embaixador de boa vontade pola Unicef.


Diálogos do Maio Cultural Galego

Diálogo Galiza - Marrocos

19:30 h.
Galiza e Marrocos. Encontro na diferenza

Mesa redonda con Valentin Carreras, Zoubaida El Fathi y Mohamed Chaib. Moderado por Xosé Luís Vergara.

Coa proxección dun capítulo da serie "HANAN, de Galicia a Marruecos" (IBISA TV)

Centro Galego de Barcelona. Sala Ferrío
La Rambla, 35-37. Barcelona
Metro Liceu (L3)


Diálogo Galiza - Guinea Bissau

22:30 h.
Humor neghro. Carlos Blanco e Manecas Costa nun espectáculo de humor e música

Presentado polas Garotas da Ribeira

Ateneu Popular de 9 Barris
Portlligat, 11-15. Barcelona
Metro Trinitat Nova (L5)


Ligazóns

4.14/5 (7 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: