Vieiros

O Parlamento Europeo aprobou esta semana, en Estrasburgo, unha directiva que criminaliza as infraccións ambientais, prevendo sancións penais contra quen contamine.

O texto estabelece un conxunto de infraccións que serán penadas coma un crime por todos os Estados membros da UE. Tamén contempla un conxunto de "regras mínimas" onde se define que é considerado como "crime ambiental". A partir do momento no que esta directiva entre en vigor, os países teñen dous anos para adoptar as medidas precisas.

O texto, que xa fora presentado en febreiro de 2007, permite que cada Estado membro aplique unhas medidas máis rigorosas que estas "regras mínimas" en cadanseu código penal, é dicir, o tipo e o grao das sancións penais é competencia dos 27, mais a directiva, en principio, contempla que sexan penadas coma un crime, por exemplo, a morte, a destrución ou posuír ou capturar especies protexidas da fauna ou da flora salvaxe.

"Un gran éxito para o medio e para a UE"
O texto aínda criminaliza "a produción, importación, exportación, colocación no mercado ou emprego de substancias que empobrezan ou estraguen a capa de ozono", mais tamén a "descarga, emisión ou introdución dunha cantidade de materias ou de radiacións ironizantes na atmosfera, no solo ou na auga, que causen ou sexan susceptíbeis de causar a morte ou lesións graves a persoas, ou danos considerábeis á calidade do ar, do solo, da auga ou da vida de plantas e animais".

A decisión do Parlamento Europeo foi admitida pola Comisión Europea, e mesmo o comisario para o Ambiente, Stavros Dimas, subliñou nun comunicado, que "este rápido acordo é un gran éxito para o medio e para a UE". A directiva foi aprobada após unha primeira lectura.