Vieiros

Vieiros de meu Perfil


Máis Alá

Xestionado por Vieiros
RSS de Máis Alá
ESTE XOVES, NO TEATRO CAIXANOVA

Vigo acolle un dous únicos concertos de Young Marble Giants no Estado

A mítica banda de postpunk regresa aos escenarios case trinta anos despois da publicación do seu único álbum, 'Colossal Youth'

Redacción - 13:20 29/05/2008

O Sinsal de primavera péchase esta noite ás 21.30 cunha cita histórica. Vigo será, xunto con Barcelona (Primavera Sound) a única cidade do Estado no que se poderá ver en directo o regreso dunha banda, os galeses Young Marble Giants, que con só un disco, Colossal Youth (1980) deixaron unha pegada imborrábel nos afeccionados á música. Colossal Youth segue sendo, 28 anos despois da súa publicación, un dos álbumes máis orixinais nunca publicados, un álbum impecábel, ademais, ao que non lle sobra unha nota. O álbum reeditouse en 2007 dando paso a unha xira de regreso con poucas e escollidas actuacións.

Young Marble Giants tiñan do punk o gusto polo discurso directo e rápido, a sinxeleza aparente da súa música (guitarra, baixo, batería e órgano) e a filosofía do do-it-yourself. Mais o seu virtuosismo era claro tamén, e as súas influencias moi variadas: Cabaret Voltaire, The Fall, The Velvet Underground, Kraftwerk...

Despois de publicar o disco, que moi logo se converteu nunha caste de best seller na escea independente, a banda gravou algúns ep's para a súa compañía Rough Trade. E separáronse. Colossal Youth ficou como o único traballo do grupo, convertido en mito para varias xeracións de músicos, dende Kurt Cobain a Low. Do mesmo xeito que sucedeu co Loveless de My Bloody Valentine ou que semellaba que ía pasar con Portishead. Non era preciso dicir máis nada. Young Marble Giants lograran o imposíbel: a perfección dentro do punk.


4/5 (4 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: