Vieiros

Vieiros de meu Perfil


Fwwwrando

RSS de Fwwwrando
METANIMAL

Un grupo de investigadores de Lugo descobre un substituto para os antibióticos do gando

O traballo determina que o ácido málico pode evitar as infeccións dixestivas dos ruminantes.

Redacción - 12:15 08/06/2008
Vacas rumiando

Vacas rumiando

Un grupo de investigadores da Facultade de Veterinaria de Lugo atopou un substituto para os antibióticos que se lles subministraban aos tenreiros até a súa prohibición en 2006. Segundo o traballo do grupo Metanimal, dirixido por Xosé Luís Benedito, o ácido málico pode servir para evitar as enfermidades da súa panza.

O equipo emprendeu o estudo para atopar unha solución para os produtores, e concluíu que o mellor substitutivo da monensina, produto prohibido, é o ácido málico, que é eficaz e económico. Outra solución, máis cara, sería o uso de fermentos e lévedos, que tamén poden paliar enfermidades como a acidose, bastante común nas granxas.

A explotación intensiva dos tenreiros de cebo e mais das vacas leiteiras provoca neles un cambio no ritmo de produción, que dexenera en estrés, que desemboca en enfermidades como consecuencia dunha baixa inmunidade. Agora, o grupo trata de estabelecer o grao de estrés preciso para evitar a aparición das doenzas. Segundo explica Benedito Castellote, "é moito máis importante non forzar ao máximo o animal na produción e poder alongar o seu ciclo vital".

Outra das liñas de traballo é a acumulación de metais pesados no organismo dos ruminantes. Queren saber se elementos como o cobre, que forma parte dos promotores de crecemento que se usan na cría intensiva, poden ter repercusión na saúde humana, ademais de seren tóxicos para os propios animais.

O cobre, que pode chegar tamén ás vacas pola contaminación dos pastos a través do purín, acumúlase no fígado, e podería ser nocivo para os humanos que consuman a víscera se a inxesta fose diaria.


0/5 (0 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: