Vieiros

Cinco anos despois chegou o recoñecemento. O 5 de abril de 2003 o atleta pontevedrés Gustavo Dacal lanzaba a súa xavelina no Centro Galego de Tecnificación Deportiva (CGTD), na súa cidade até os 78,88 metros, a mellor marca, até o momento, do Estado. Mais a Federación Española de Atletismo (FEA) invalidou a marca, por supostas irregularidades (non efectuar o lanzamento co equipamento oficial do seu clube e empregar unha xavelina que non pasara a homologación, segundo a federación).

Esta semana a Audiencia Provincial de Madrid recoñeceu a lexitimidade daquel lanzamento, feito que converte a Dacal no novo plusmarquista estatal, superando cos seus 78,88 metros o anterior rexistro, de 78,78 m, que ostentaba o cántabro Julián Sotelo dende 1992. Pos detrás sitúase o murciano Rafael Baraza, cos seus 70,60 metros.

Recoñecidos os 78,78 metros
A Xustiza condenou, ademais, á FEA a pagarlle 23 mil euros, máis intereses, a Gustavo Dacal polo dano que lle supuxo a anulación da súa marca, que o deixou sen cobrar a bolsa ADO do ano 2004. O que non se lle pode compensar ao atleta foi a oportunidade que tivo en 2003 de ir ao Mundial de París, posto que cunha marca semellante podería mesmo chegar á final.

Agora a Dacal, que xa ten 30 anos e que viu como baixaba o seu caché todo este tempo nos criterios internacionais aos que acudía como un atleta máis, e non como plusmarquista, quédalle preparar o Campionato Estatal que se desenvolve en xullo. Nesta proba o pontevedrés vai buscar o pasaporte para Beixín, que conseguiría directamente ao acadar a marca mínima, que está nos 77,80 metros.