Vieiros

Vieiros de meu Perfil


Edición xeral

RSS de Edición xeral
SEN LIBERDADE, PERO CON FORZA

Os muros de Teixeiro, feble barreira para as arelas de comunicación

Un grupo de catro presas do centro penitenciario elaboran un programa de televisión co fin de demostrar que non son "simplemente delincuentes".

Isabel G. Couso - 18:50 17/06/2008

Rita, Montse, Ana e Aurora. Estes son os nomes de catro mulleres valentes, con ganas de demostrar ao mundo que no cárcere "non só hai persoas malas". Gritan "non somos simplemente delincuentes" e reclaman unha atención que até o de agora unha boa parte da sociedade lles nega. O seu proxecto, liderado pola Asociación Nosotras Intramuros, é o dun programa de televisión feito dende o cárcere pero con vocación de chegar a todos aqueles que as queiran escoitar.

Grazas a esta iniciativa, estas mulleres que viven no centro penitenciario de Teixeiro, puideron achegarse ao funcionamento dun medio de comunicación como a televisión. Co asesoramento da Asociación e a colaboración da Facultade de Xornalismo de Compostela, elaboraron un guión, unha escaleta de contidos, presentaron un informativo, un magazine de entrevistas e mesmo participaron nun debate.

Os temas que abordar tivéronos claros: a vida cotiá na cadea, das dificultades coas que se atopan para estudar ou simplemente do descoñecemento que existe sobre o que ocorre nas prisións. De momento, ningunha canle se interesou no proxecto para emitilo e achegalo ao grande público, pero elas agardan que así sexa.

Así, estas dúas coruñesas, unha valenciana e unha ferrolá tiveron que superar os seus nervios, a tensión de colocarse ante unha cámara, para comunicar as súas inquedanzas. De primeiras a experiencia gustoulles: permitiulles aprender, coñecer outra realidade e fuxir polo menos durante unhas horas dos muros de Teixeiro.

Privación da liberdade, non da palabra
Malia estar en prisión, estas mulleres reclaman a súa liberdade de expresión. Queren que se oia a súa voz e esta non é a primeira actividade na que participan. Un programa de radio e mesmo un blog son outros dos seus proxectos xa en marcha. "Gustaríanos que as novas tecnoloxías servisen para abrir portas e cruzar os muros e ser un pouquiño máis visíbeis na sociedade", así reza o seu blog, Chicass10, onde se recollen todo tipo de contidos.

Para o futuro, non descartan repetir a experiencia, mais teñen outras ideas: un curso de maquillaxe, o camiño de Santiago... o que sexa para demostrar as súas gañas de facer cousas e a súa vocación de reinserción.


Ligazóns

3.4/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: