Vieiros

Vieiros de meu Perfil


Canal Verde

Xestionado pola Federación Ecoloxista Galega e Vieiros
RSS de Canal Verde
FUTURO ENERXÉTICO

Media ducia de países rifan polo petróleo do Ártico

Os científicos estiman que no Círculo Polar Ártico se agochan 90.000 millóns de barrís de petróleo.

Redacción - 10:00 26/07/2008

Noruega, Rusia, Canadá, Dinamarca... e, como non? Estados Unidos. A Inspección Xeolóxica estadounidense (USGS) sospeita que no fondo do Ártico hai uns 1.670 billóns de pés cúbicos de gas natural e uns 90.000 millóns de barrís de petróleo, o que cubriría a demanda mundial para un período de tres anos. Este dato non pasa desapercibido para ningunha potencia, e moito menos para os países próximos ao polo.

Segundo o diario Financial Times, os científicos consideran que o Ártico pode ter o 13% das reservas mundiais de petróleo aínda por descubrir e, aínda máis, o 84% destes recursos enerxéticos poderíanse atopar a pouca distancia da costa.As grandes potencias estanse a refregar as mans, sobre todo, tendo en conta que hai unha semana que o goberno estadounidense levantou a prohibición vixente por 17 anos que impedía a perforación nas costas do seu territorio. Ábrese así a veda para extraer o petróleo e iníciase, ou reábrese, a loita polo Círculo Polar Ártico.

Guerra polo Ártico
Rusia xa colocou unha bandeira baixo o Polo Norte o ano pasado e reclamou a súa soberanía. Noruega prepara un informe; os daneses traballan en Groenlandia e Canadá leva cinco anos recadando datos sobre o seu leito mariño para esixirllo á ONU. Todos están detrás do petróleo e non queren quedar fora do reparto, sen embargo a actual é unha situación de indefinición.

O fondo do Polo Norte non é considerado actualmente territorio de ningún país nin tampouco son augas internacionais. A súa administración corresponde á Autoridade Internacional dos Fondos Mariños. Ademais, a súa explotación depende do desxeo dos casquetes polares, unha consecuencia directa do cambio climático. Polo momento, os países implicados pactaron rexirse pola Convención da ONU sobre o dereito do mar, sen embargo todos están xa a tomar posicións. O futuro desvelará quen se proclamará gañador nesta nova guerra polo petróleo.


3/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: