Vieiros

Fabiola Sotelo, Directora Xeral de Cooperación Exterior da Xunta de Galicia, foi recoñecida co Premio Nacional de Cooperación ao Desenvolvemento do Fondo de Nacións Unidas pola Infancia (UNICEF).

A Fundación UNICEF ven de fallar os seus Premios 2008, destinados a galardoar persoas, equipos ou institucións de ámbito internacional que traballan pola defensa dos dereitos da infancia e contribúen a mellorar as condicións de vida e as opcións de futuro dos nenos e nenas do mundo.

Este galardón supón o recoñecemento por vez primeira do labor dunha representante da administración pública de Galiza. Os galardóns, que teñen carácter anual, concédense en once categorías.

UNICEF considerou o esforzo persoal de Fabiola Sotelo para coa infancia e a loita contra a pobreza. Tamén recoñeceu o traballo desenvolvido por Cooperación Galega no Sur cos colectivos máis vulnerábeis como as mulleres, as nenas e os nenos, a súa aposta pola educación, a capacitación e a formación, o incremento do labor dirixido a África e en xeral, aos países menos adiantados (PMA).