Vieiros

"Medal Picks. Who'll reach the winner's podium in all 302 events" (Selección de medallas. Quen vai gañar e chegar ao podio nos 302 deportes) é o título deste artigo, asinado por Brian Cazeneuve na sección Inside Olympics da revista norteamericana Sports Illustrated.

Nel, o xornalista (enviado especial a Beixín) fai unha estimación das medallas que podería levar cada equipo ou deportista individual en cada unha das 302 disciplinas que compoñen os Xogos Olímpicos de Beixín.

As medallas galegas
Cazeneuve ve medallistas a só dous galegos dos 12 que competirán en Beixín. A David Cal dálle unha medalla de prata no C-1 500 metros, e a Xabier Gómez Noya o ouro na proba de triatlón.

Segundo esta revista, o ouro no C-1 500 metros ha ser para o alemán Andreas Dittmer, e terceiro será o bielorruso Aliaksandr Zhukouski. Nos 1.000 metros non contan que haxa medalla para o padexeiro galego. O primeiro posto danllo ao húngaro Attila Vajda, o segundo ao canadense Thomas Hall, e o bronce sería para o alemán Dittmer.

En canto ao triatlón, dende Sports Illustrated non dubidan que o ouro vaia ser para Gómez Noya, a prata para o neozelandés Bevan Docherty e o bronce para o francés Frédéric Belauvre, principal rival do ferrolán esta ano, na BG Copa do Mundo. Ademais, nesta disciplina fan unha observación ao pé da listaxe de metais, sinalando que "Gómez foi unha vez excluído da competición debido a unha válvula cardíaca anormal", mais non especifican nada máis, nin sequera que podería chegar a ser un problema que afectaba o rendemento e a saúde do triatleta, que xa foi solucionado. Tampouco se conta cunha medalla para Iván Raña.

Quen lles rouba as medallas aos outros olímpicos galegos?
Comezamos cos piragüistas e, segundo esta listaxe, o equipo estatal ha quedar sen medallas (agás a de Cal). No K-4 feminino 500 metros (onde participan as galegas Sonia Molanes e Teresa Portela) gañaría Alemaña, seguida de Hungría e Polonia.

No K-1 500 de Portela a primeira sería a húngara Katalin Kovács, e no K-2 500 de Molanes (e Manchón), as primeiras serían as alemás Fischer e Reinhardt. Perucho, que rema co catalán Saúl Craviotto, non gañará, segundo esta avaliación, ningunha medalla no K-2 500 metros, posto que o ouro sería para os húngaros Kammerer e Kucsera; a prata para a parella alemá e o bronce para a húngara.

En atletismo non habería, segundo a aposta desta revista, medalla nin para Santi Pérez (en 50 quilómetros marcha, que gañaría o ruso Vladimir kanaykin); nin para Sandra Aguilar (en maratón, que gañaría, segundo esta listaxe, a chinesa Zhou Chunxiu); nin para David Gómez (no decathlon, que gañaría o norteamericano Bryan Clay).

Tampouco van poder chegar ao podio a parella formada para competir na clase Tornado de vela, Antón Paz e Fernando Echávarri. No seu lugar levarían medalla os australianos Bundock e Ashby, seguidos dos austríacos Hagara e Steinacher e da parella Booth e Nieuwenhuis, dos Países Baixos.

As mozas do equipo feminino de baloncesto, do que fai parte a ferrolá Tamara Abalde, tampouco subirían ao podio que ocuparían, por esta orde, os EUA, Australia e Rusia.