Vieiros

"É un proceso lento, trapalleiro e complicado", xustificaba este mércores o conselleiro de Medio Ambiente, Manuel Vázquez, ao respecto da ampliación da Rede Natura. "Non se fai nun plis plas", insistiu Vázquez. O responsábel de Medio Ambiente afirmou que o proceso necesita "vontade política" e tamén "estudos rigorosos e complexos", ademais de acordos cos sectores implicados.

Respondía así o conselleiro á acusación da Asociación para a Defensa Ecolóxica de Galiza (Adega), sobre o incumprimento da promesa de ampliación de espazos naturais protexidos e o presunto privilexio ao empresariado de determinados sectores á hora de ocupar o territorio. Os ecoloxistas apuntaran especificamente á industria acuícola, eólica e hidroeléctrica á hora de denunciar suposto trato de favor da administración, opinando que as políticas da Xunta se facían á medida destas empresas no canto de fixar primeiro os criterios medioambientais mínimos.

Sobre o asunto, o conselleiro insistiu en que ao goberno actual "se lle recoñeza" o cambio de políticas respecto do anterior executivo "que tiña a metade do plan eólico en Rede Natura" e desafiou a Adega a presentaren formalmente unha proposta que emende as deficiencias que denuncian. Ao fío, acusou o colectivo ambiental de "salvapatrias barato que de media verdade fai unha mentira".