Vieiros

Un equipo de arqueólogos turcos e belgas informou esta semana do achádego en Turquía dos restos dunha colosal estatua que representa ao emperador Marco Aurelio, concretamente nas termas romanas de Sagalassos, a actual Aglasun.

A cabeza, dunha altura de 90 centímetros, así como o brazo dereito sostendo unha esfera na man, atópanse en moi bo estado, segundo o conservador do museo de Burdur, Haciali Ekinci. Con anterioridade xa apareceran a parte inferior das pernas. Calcúlase que a estatua debeu ter unha altura de 4,5 metros.

Sagalassos, habitada deica o século VII, foi destruída nesa época por varios terremotos e caeu no esquecemento. Marco Aurelio, que reinou dende o 161 d.C deica o 180 d.C foi un dos coñecidos como os Cinco emperadores bos, os primeiros da dinastía dos Antoninos, de orixe hispana, e unha das figuras máis importantes da filosofía estoica.