Vieiros

Vieiros de meu Perfil


Fwwwrando

RSS de Fwwwrando
INCONSTITUCIONALIDADE

O 'spammer' estadounidense Jeremy Jaynes queda absolto

O Tribunal Superior de Virxinia (EUA) considera que a lei pola que se condenou vai contra a liberdade de expresión.

Redacción - 12:30 18/09/2008
Jeremy Jaynes

Jeremy Jaynes

O Tribunal Superior de Xustiza do estado norteamericano de Virxinia decidiu absolver o 'spammer' Jeremy Jaynes, que fora condenado a nove anos de prisión. Segundo o tribunal, a lei anti-spam do estado é "demasiado ampla" e pode coartar o dereito constitucional á liberdade de expresión.

Na sentenza considérase que enviar correos masivos co remitente falsificado pode ser un xeito de promover o discurso político anónimo, que protexe a primeira emenda da Constitución dos EUA. Deste xeito, anúlase a condena a Jaynes.

O empresario agora absolto comezou o seu traballo a finais dos anos 90, enviando correo lixo a millóns de persoas de todo o mundo. Calcúlase que facturaba 750 mil dólares ao mes. Porén, no ano 2004 a Policía interviu na súa casa e incautouse do material informático e de 1.300 millóns de enderezos de correo electrónico que tiña gardadas. A pesar de que vivía e traballaba en Carolina do Norte, foi procesado en Virxinia, sede de America On Line (AOL), que o denunciou.

Os avogados de Jaynes alegaran que a lei contra o spam de Virxinia era inconstitucional, pero o tribunal de apelación rexeitara os seus argumentos. Porén, seis meses máis tarde, aprobou a cuestión de inconstitucionalidade.

O fiscal xa anunciou que recorrerá a decisión perante o Tribunal Supremo. En calquera caso, Jaynes non sairá da cadea, pois está condenado por outros cargos que lle supoñen uns 42 meses de prisión.


2,67/5 (3 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: