Vieiros

Maldito Bastardo! rodouse ao longo de tres anos debido, principalmente, ao seu inexistente financiamento. Trátase dunha longametraxe dixital, cento por cento galega e independente, dirixida polo mozo compostelán Javi Camino e protagonizada por Juanillo Esteban, Pilar Miguélez e Tamar Novas. Malia aos seus modestos medios, o filme está colleitando numerosos éxitos en festivais dedicados ao cinema fantástico, tanto no Estado Español coma noutros países. De feito, obtivo o premio á mellor película no festival italiano Fearmament.

O equipo da película vén de regresar de Holanda, onde participou no BUT Film Festival. Agora prepara as maletas para viaxar a Cataluña, ao Festival Internacional de Sitges, un dos puntos clave do cine fantástico mundial. A película proxectarase o día 9 de outubro dentro da sección 'Midnight X-trem', unha das máis queridas polos asiduos ó festival, caracterizada por ser lugar de encontro para as propostas máis exóticas e radicais do cine de xénero dos últimos anos.

Maldito Bastardo! é unha historia real chea de violencia e loucura, "poboada por doutores chiflados, garrulos salvaxes, androides teledirixidos, porcos mecánicos e deidades de peluxe". Unha historia onde o verídico acabará "fundíndose coas invencións e distorsións propias dun narrador senil, creando un conxunto totalmente inverosímil".