Vieiros

Vieiros de meu Perfil


Edición xeral

RSS de Edición xeral
Posibilidades de creba

Leite Río nega ter roto negociacións cunha das meirandes cooperativas leiteiras de Pontevedra

Din que van negociar as condicións de compra e o prezo da materia prima cos administradores de Indega, pero o leite vanllo recoller directamente aos gandeiros.

Redacción - 14:00 01/10/2008
Logo de Indega

Logo de Indega

A comezos da semana a empresa Leite Río sinalaba, nun comunicado dirixido á cooperativa Indega (a segunda máis importante da provincia de Pontevedra) que non había recoller máis leite a este sociedade dende o primeiro de outubro.

Porén, nese día, de mañá, a compañía pertencente ao empresario Xesús Lence, remitíalle un fax á cooperativa pontevedresa sinalando que non tiñan roto as relacións, xa que queren manter as negociacións sobre os criterios que fixan o prezo da materia prima. Neste escrito tamén dicían que pretenden recoller o leite directamente de cada un dos 250 gandeiros asociados a Indega, non o que lles ofreza a cooperativa en conxunto.

No fax, que chegou a mans da xerente de Indega, Susana Penido, a empresa leiteira sinala que "as negociacións das condicións de compra do leite dos socios serán entre os órganos de dirección de Indega e Leite Río para todos os parámetros de calidade, volume e prezo", mais que, a partir de agora, as relacións comerciais hanse facer entre a compañía luguesa e cada un dos gandeiros pertencentes a esta cooperativa, non directamente con Indega, que perde a figura de primeiro comprador. O escrito segue dicindo que este novo sistema, que entrará en vigor a partir desta cuarta feira, "permitirá optimizar o transporte e a xestión redundando nunha meirande eficiencia de custos, tan necesaria nestes momentos de dificultades comerciais no mercado lácteo español".

Perigo de creba para a cooperativa
O propietario e administrador único de Leite Río, Xesús Lence, volveu reiterar, de mañá, estas cuestións, insistindo na súa vontade de "recoller o leite aos propios gandeiros" e contar con Indega só para acordar o prezo. O que non quere Lence, segundo revelou, é abonar a prima que, até esta cuarta feira, pagaban á cooperativa pola súa condición de primeiro comprador. "Queremos seguir mantendo relacións con Indega", reiterou Lence.

Esta cuarta feira, ademais, os tres sindicatos agrarios (Unións Agrarias, Xóvenes Agricultores e Sindicato Labrego Galego) convocaron unha manifestación ante a sede da Consellaría de Medio Rural para exixir ao Goberno que adopte medidas para evitar o peche da cooperativa.

Na tarde da cuarta os tres sindicatos reuníronse cos administradores de Indega e na xuntanza sinalaron que consideraban que o caso desta sociedade formaba parte dunha estratexia das industrias lácteas para facer presión directamente aos gandeiros, sen a mediación de cooperativas e sindicatos. Polo seu lado, a xerente de Indega, Susana Penido, denunciaba que a decisión de Río ha supor que a súa entidade pase de facturar 13,5 millóns de euros a 3,5, o que, á súa vez, levaría ao peche da cooperativa.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí:



Os tres sindicatos protestando en Lalín, baleirando varias botellas de leite francés
Os tres sindicatos protestando en Lalín, baleirando varias botellas de leite francés
Leite Ríoa ameazara con non recollerlle a materia prima á cooperativa a partir desta cuarta feira
Leite Ríoa ameazara con non recollerlle a materia prima á cooperativa a partir desta cuarta feira