Vieiros

Vieiros de meu Perfil


Máis Alá

Xestionado por Vieiros
RSS de Máis Alá
VENRES, ÁS 20.30 NO TEATRO ROSALÍA DA CORUÑA

Tres xeracións do folk na gala dos 'Premios Opinión'

Budiño recibirá o galardón ao mellor disco do 2007, mentres que Emilio Cao recollerá o premio 'Andaina Senlleira'.

Redacción - 13:59 03/10/2008

Os premios Opinión de música folk chegan á súa sétima edición e celebran este venres á noite a súa habitual gala, que terá lugar no Teatro Rosalía da Coruña a partir das oito e media da tarde. Os premios teñen dous grandes protagonistas este ano. Por unha banda Xosé Manuel Budiño e o seu Home, elixido 'mellor disco folk' do 2007. O gaiteiro de Moaña actuará na gala acompañado de Mercedes Peón, que cantará o tema Inmaterial. Aínda que nun primeiro momento falouse da posibilidade de que Xoel López Deluxe interpretase con Budiño o seu Ollos de sal, finalmente parece que non vai ser posíbel, pois o cantante atópase en América e non vai poder chegar a tempo.

O outro protagonista será Emilio Cao, que recibirá o premio 'Andaina Senlleira', inaugurando o palmarés deste galardón, destinado a recoñecer tanto a artistas como a institucións e persoas que traballara a prol da música folk en Galiza.

A Budiño acompañarano no escenario Entre Trastes, unha formación moi interesante, en opinión de Óscar Losada, alma do galardón, "porque non había traballos baseados en cordas e porque máis da metade dos seus temas son de creación propia". E tamén as rapazas de Lulavai, un cuarteto de arpistas moi novas, que están sorprendendo nos seus primeiros pasos como grupo. Tres xeracións de artistas que constitúen unha mostra de que o folk galego se mantén con forza malia á crise da industria e aos altibaixos "non está de moda, e nos últimos anos xurdiron máis grupos pero non aumentou a demanda, é un momento complicado", di Losada.

En canto ao propio futuro do premio, Óscar Losada é cauto: "nunca se sabe, o vento sopra a favor, pero pode deixar de soprar; nós estaremos aí mentres siga soprando, aínda que sexa pouco". Así e todo, Losada anuncia para o vindeiro ano "un espectáculo único, con moitísimos músicos xuntos no escenario" e lanza unha crítica ao artistas e profesionais do folk galego: "nas galas boto de menos a presenza de máis músicos e de representantes da industria; nos premios de teatro, ou do audiovisual está todo o mundo; nos da música, non sei por que, non están".


3.5/5 (6 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: