Vieiros

Entre o 1 de xuño e o 30 de setembro, Galiza sufriu 1.011 incendidos que afectaron a 1.131 hectáreas. Logo de facilitar estes datos, o conselleiro de Medio Rural, Alfredo Suárez Canal, salientou que “é o mellor verán da historia dende que existe información sobre incendios (1995)”. Sinalou que a superficie afectada polo lume reduciuse un 95% fronte á media do período 1995-2007.

Suárez Canal recoñeceu diante dos xornalistas que as condicións meteorolóxicas axudaron pero considera que “non é o único que explica a evolución dos lumes este verán”. O conselleiro cre que foi decisivo o dispositivo da Xunta e os novos protocolos de actuación. Dende Medio Rural consideran que tamén se fixo notar a “colaboración” e a “concienciación” da cidadanía.

Porén, o conselleiro quixo ser prudente ao afirmar que aínda que xa pasou a estación máis perigosa, aínda queda “moito camiño por percorrer até final de ano” e lembrou que a protección dos montes é “unha batalla de todos”.