Vieiros

Vieiros de meu Perfil


Edición xeral

RSS de Edición xeral
Conflito nos Balcáns

Bosnia xa é a única ex república iugoslava que, xunto con Serbia, non recoñece a independencia de Cosova

Montenegro e Macedonia recoñecérona esta quinta feira. Na UE, coa decisión de Portugal o martes, son 22 estados os que xa o fixeron.

Redacción - 11:00 10/10/2008

Montenegro e Macedonia recoñeceron esta quinta feira pola noite a independencia de Cosova, horas despois de que a Asemblea da ONU aceptase o recurso presentado por Serbia ante a Corte Internacional de Xustiza (CIX) sobre a legalidade do autoproclamado novo estado.

O ministro macedonio de Exteriores, Antonio Milososki, anunciou a decisión do seu goberno, que acatou a votación parlamentaria previa ao respecto. A decisión de Macedonia chegaba logo de facer o mesmo a República de Montenegro pouco antes.

Milan Rocen, homólogo montenegrino de Milososki, explicou que a postura do executivo macedonio obedece a vontade do país de favorecer a integración europea. Belgrado reaccionou de inmediato anunciando que a presenza do embaixador de Montenegro en Serbia xa non era necesaria.

"Os países da rexión teñen unha responsabilidade especial para preservar a paz e a estabilidade nos Balcáns", declarou o ministro de Exteriores serbio, Vuk Jeremic, que a principios desta semana asegurou que o recoñecemento montenegrino de Cosova sería como "unha puñalada nas costas".

Montenegro e Serbia están historicamente ligadas, tanto desde o punto de vista cultural como relixioso. Unha importante comunidade serbia vive en Montenegro e numerosos montenegrinos residen en Serbia.

Ex Iugoslavia, Unión Europea e ONU
Das repúblicas ex iugoslavas, Bosnia-Herzegovina é a única que non recoñeceu aínda a independencia de Cosova. O país, conformado por dúas entidades, a República Srpska e a federación bosnio-croata, organizou o luns eleccións municipais cun resultado que lonxe de unificar o goberno, consolida a división étnica.

A ONU tampouco recoñeceu o novo estado, e na UE fixérono un total de 22 dos 27 estados membros. O último -malia as críticas de deputados e forzas da esquerda- foi Portugal, o pasado martes.


5/5 (1 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: