Vieiros

Este mércores presentouse en Compostela o programa 'Xantar na casa', froito da colaboración entre a Vicepresidencia da Xunta e as administracións locais dos concellos adscritos. O servizo achegará menús elaborados con produtos do país aos domicilios de persoas maiores, dependentes ou aquelas que se atopen en situacións de exclusión social. A finalidade do programa é garantir a permanencia no fogar dos beneficiarios, permitindo ao mesmo tempo unha maior autonomía das familias coidadoras.

A primeira fase do plano comezará a funcionar de forma inmediata en 90 concellos, dando cobertura a máis de 800 persoas. Isto supón un custo de 800 mil euros para a Vicepresidencia, mentres que os usuarios pagarán un máximo de 54 euros cada mes. Os concellos nos que 'Xantar na casa' comezará a funcionar agora foron elixidos atendendo a criterios como o índice de avellentamento, ratio de dependencia senil ou grao de dispersión da súa poboación. O programa contará con nove vehículos e 34 profesionais adicados ás tarefas de elaboración, envasado e distribución da comida.

O acto de presentación celebrouse este mércores na praza da quintana. Ademais do vicepresidente estiveron presentes a directora xeral do Benestar, María Xesús Lago; o xerente do Consorcio Galego de Servizos de Igualdade e Benestar, Lois Pérez Castrillo; e os alcaldes dos 90 concellos que comezarán a aproveitarse do programa inmediatamente.

Quintana valorou de forma positiva a importancia que ten a colaboración entre a Vicepresidencia e os concellos, realizada a través do Consorcio Galego de Servizos de Igualdade e Benestar. Tamén resaltou que este proxecto muda o fluxo de interacción no eido da dependencia, xa que "agora son os recursos os que se achegan á xente e non a xente aos recursos".