Vieiros

Vieiros de meu Perfil


Edición xeral

RSS de Edición xeral
Inicia o trámite parlamentario

Táboas salienta o "carácter social e vangardista" da Lei de Vivenda

A conselleira di que a norma fai efectivo o dereito ao seu acceso. PSdeG e BNG rexeitan a emenda á totalidade presentada polo PPdeG.

Redacción - 19:10 21/10/2008

A conselleira de Vivenda e Solo, Teresa Táboas, presentou este martes no Parlamento o proxecto de Lei de Vivenda como unha medida "vangardista e de carácter social" que supón "o colofón" lexislativo nesta materia.

PSdeG e BNG déronlle o seu apoio ao proxecto de lei, votando en contra da emenda á totalidade presentada polo PPdeG, polo que segue o seu curso parlamentario. A popular Pilar Rojo criticou que se retirase a incompatibilidade da figura do alcalde-promotor, logo de que os socialistas "emendasen" o proxecto, e denunciou que invade competencias doutras consellarías.

Ademais, dende o PPdeG mostraron de novo o seu rexeitamento á parte da norma que estabelece o deber do propietario de conservar a vivenda en condicións de habitabilidade. De non ser así, a Xunta podería expropiar e rehabilitar os edificios baleiros e en ruínas para rehabilitalos e destinalos á bolsa de aluguer.

O socialista Luís Toxo e a nacionalista Carme da Silva coincidiron na conveniencia de reformar esta lei -que modificará a vixente dende 2003- para se adaptar ás esixencias dos novos tempos.

Neste senso, Teresa Táboas definiu o proxecto de "ambicioso, pero realista", e cun "marcado carácter social". Asegurou, ademais, que supón "un auténtico código de dereito á vivenda", que lle outorga rango de lei tanto á política de aluguer coma á de rehabilitación.

Plan Sectorial de Solo Residencial

Ademais, a petición propia, a conselleira presentou o Plan Sectorial de Solo Residencial, que prevé a construción de 45.600 vivendas protexidas a través de 95 actuacións distribuídas en 57 concellos.

A actuación suporá a transformación urbanística de 8,7 millóns de metros cadrados, que se complementarán coa "reserva de solo para zonas verdes, equipamentos e aparcadoiros públicos".

O plan, que sairá publicado no DOG esta semana, estará aberto durante dous meses a alegacións antes de que o aprobe o Consello.


5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: