Vieiros

A Dirección Xeral para o Deporte colaborará co Celta Indepo para achegar o baloncesto feminino aos participantes nos programas de Deporte Escolar. Esta acción está incluída nun proxecto do club para ampliar a súa expansión, chegando a sectores da sociedade aos que actualmente non chegan (os máis novos ou a terceira idade).

A colaboración entre a Dirección Xeral e o club establécese a través da páxina web www.deporteescolargalego.org, xa que se ofrece a todos os clubs e centros escolares que participen nos dous programas do Deporte Escolar (Deporte na Escola e Competición en Idade Escolar) a posibilidade de solicitar entradas para asistir gratis aos partidos do Celta nas Travesas. Segundo a a delegada provincial da Consellería de Cultura e Deporte, María Xesús López Escudeiro, con esta colaboración "non so se está a gañar público, senón que tamén podemos enganchar a novos e novas deportistas".

López Escudeiro destacou o feito de que este club cumpre na presente tempada (ano 2009) 40 anos de existencia, "o cal non é sinxelo nestes tempos" e subliñou o traballo feito no Celta, onde foron capaces de ter, á vez, un equipo na elite, "nestes momentos con dúas xogadoras olímpicas, cun traballo espectacular na canteira".