Vieiros

O xornal catalán La Vanguardia acaba de publicar na rede todo o seu arquivo, dende o primeiro número. Son, en total, 127 anos de historia viva que se poden buscar, ver e mesmo descargar en formato PDF.

Na portada do apartado da web do xornal destácanse acontecementos como a morte de Kennedy, ou de Lady Di, ou acontecementos máis locais como o debut de Johan Cruyff no Barça ou a inauguración do funicular de Montjuïc.

Pero La Vanguardia tamén foi testemuña da historia galega. Por exemplo, podemos atopar unhas declaracións de Castelao un par de meses despois de que estoupase a Guerra Civil, nas que amosa a súa dor por non ter podido entrar en vigor o Estatuto de Autonomía: "Teño cincuenta anos. Case un neno, paseaba baixo os soportais das rúas santiaguesas soñando cunha Galiza libre, capaz de erguer a súa voz e expresar o seu espírito por si mesma. [...] Agora, cando a tarefa parecía feita, resulta que era iso -o máis malo de nós- o que máis nos facía falta".

Tamén se garda, por exemplo, unha nota do 6 de decembro de 1972 que fala dunha resolución da Real Academia Galega de nomear as rúas da cidade vella da Coruña en galego. O autor, o correspondente Xosé F. Ferreiro, pregúntase cando se recuperarán os topónimos na nosa lingua: "Carballiño, Porto do Son. Xubia, Rianxo. Viana do Bolo, Xinzo de Limia... Tempo ao tempo".