Vieiros

O equipo arousán sufriu unha derrota previsíbel, fronte ao Tarbes que lidera o grupo da Fiba Eurocup e tamén a Liga Feminina Francesa. Mais o marcador non fixo xustiza ao decorrer do partido, xa que o Extrugasa chegou ao último cuarto con só 12 puntos de desvantaxe. Foi no derradeiro período cando as xogadoras francesas racharon definitivamente o encontro cun parcial de 26-7.

A clave para a derrota do Extrugasa foi o elevado acerto no tiro das francesas, especialmente nos lanzamentos exteriores. Así, o Tarbes anotou 10 tiros de tres puntos, cunha porcentaxe do 59% de acertos sobre tiros intentados. Ademais o Tarbes impuxo o seu poderío físico no xogo interior e non deu ningunha opción a un equipo galego que se viu claramente superado no rebote.

Por parte das francesas destacou Ndeye Ndiaye, con 12 puntos e 11 rebotes, mentres que Katia da Silva foi a mellor do equipo arousán, con 12 puntos e seis rebotes.

O Tarbes está a cumprir cos prognósticos e afiánzase como líder do "Grupo J" da Eurocup. As xogadoras galegas parecen abocadas a loitar coas italianas do Pallancanastro Ribera por unha segunda posición que tamén da acceso directo á segunda fase. Polo momento o Extrugasa mantén a segundo lugar, á espera do que fagan esta noite as italianas fronte ao Olivais Coimbra portugués.