Vieiros

Vieiros de meu Perfil


Edición xeral

RSS de Edición xeral
Debate fiscal na Cátedra Alexandre Bóveda

O concerto económico vasco: ideas para que Galiza trate "de ti a ti" o Estado

O viceconselleiro de Facenda e Finanzas do Goberno Vasco sinalou "o interese" para Galiza de tirar leccións do modelo aplicado en Euskadi.

Redacción - 14:00 07/11/2008

As especificidades do caso vasco convérteno nun sistema lonxe de ser referencia para Galiza, en opinión do viceconselleiro de Facenda e Finanzas do Goberno Vasco, Juan Miguel Bilbao, quen si opina en todo caso que é de interese para Galiza fixarse no modelo. Así o opinou durante a intervención esta semana nas conferencias sobre financiamento autonómico que organiza estes días a Cátedra Alexandre Bóveda.

"Non hai un modelo de laboratorio, válido para todas as comunidades, senón unha decantación histórica, como é o caso vasco, provocado por uns intereses que hai que conciliar", explicou Bilbao. Á súa beira, o secretario xeral de Relacións Institucionais da Vicepresidencia da Xunta, Xoán Antón Pérez-Lema, subliñou que "Galiza non é un país pobre" e explicou que o modelo vasco "é un a considerar xunto con outros moitos". Pérez Lema afirmou que Galiza debe apostar por estabelecer unha relación "de ti a ti" co Estado no marco dun novo Estatuto e garantir o cumprimento da débeda histórica.

O ciclo organizado na Universidade de Vigo tamén incluíu este xoves unha mesa redonda na que participaron os expertos Santiago Lago, Xavier Martínez Cobas e Xavier Labandeira. Entre as ideas expostas, o profesor Lago Peñas falou da necesidade de avanzar cara a un modelo federal onde as actuais comunidades autónomas se responsabilicen en maior grao das súas estratexias económicas. Na opinión de Santiago Lago, un dos problemas actuais é que os gobernos consideren que o máis proveitoso para eles "é ir pedirlle esmola a Madrid". Doutra banda, o profesor Martínez Cobas, apuntou que fronte a un modelo no que o Estado "recada os nosos impostos e fai irlle pedir esmola" a necesidade cara ao futuro é a introdución dunha facenda propia en Galiza que recade as taxas e faga por outra beira achega á caixa común do Estado.


5/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: