Vieiros

Vieiros de meu Perfil


Fwwwrando

RSS de Fwwwrando
SEMANA DA CIENCIA

Alumnado de primaria coñece as granxas dixitais

A iniciativa da USC e da Dirección Xeral de I+D+i leva os produtos directamente do produtor ao consumidor a través da internet.

Redacción / EP - 12:50 13/11/2008
Cabeceiro da web de Granxa Familiar

Cabeceiro da web de Granxa Familiar

Estase a desenvolver por todo o país a Semana da Ciencia, organizada pola Dirección Xeral de I+D+i da Consellaría de Innovación e Industria, a través do Plan Incite, e o Ministerio de Industria a través da Fundación Española para a Ciencia e a Tecnoloxía (FECYT). Ademais da divulgación científica, a Sociedade da Información e as TIC teñen unha presenza importante dentro da programación.

Unha das iniciativas que se expuxeron foi a das granxas dixitais, que están a ser impulsadas por un grupo de investigación da Universidade de Santiago de Compostela (USC), co apoio da Dirección Xeral de I+D+i. Este sistema permite ligar directamente o produtor e o consumidor, evitando os intermediarios. Deste xeito, as persoas produtoras conseguen unha remuneración xusta e as compradoras unha calidade acreditada.

O director xeral, Salustiano Mato, salientou que a iniciativa, que se presentou dun xeito ameno perante o alumnado dun colexio de primaria de Compostela, busca "a interacción entre o mundo urbano e o rural" coa axuda as TIC, de xeito que "empecen a recuperarse os costumes de comercio directo, na liña do comercio xusto".

A experiencia comezou como un proxecto piloto na área rural próxima a Compostela e, segundo o investigador Carlos Ferrás, está a obter "resultados extraordinarios" e fomentar que as familias visiten as granxas para coñecer de primeira man o seu traballo.

O programa vende directamente os seus produtos a través da web granxafamiliar.com, e, asemade, impulsa o agroturismo a partir do programa para nenos e visitantes, creando "unha ponte de coñecemento entre cidade e campo".

Pola súa banda, Salustiano Mato subliñou que un dos obxectivos da Semana da Ciencia é que a infancia "visualice o lado máis divertido da ciencia e da tecnoloxía e que se decate de que hai moitas formas de aprender e a de facelo divertíndose é a máis eficiente".

Outras actividades

Durante a Semana da Ciencia tamén se pode, por exemplo, visitar o Centro de Supercomputación de Galicia (Cesga), situado no Campus Sur de Compostela, até o 14 de novembro, de 10 a 18 horas. O 13 e o 14 de novembro, a Facultade de Informática da Universidade da Coruña ofrece, de 18 a 21 horas, sesións de demostración de instalación e uso de software libre. Estas e outras actividades pódense consultar na web do programa.


5/5 (2 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: