Vieiros

Vieiros de meu Perfil


Edición xeral

RSS de Edición xeral
A política de EUA en Oriente Próximo

O 'man dereita' de Obama descúlpase por unhas declaracións racistas que fixo seu pai

"Claro que vai influír en que o presidente sexa pro-israelí. Por que non o ía facer? Que é, un árabe? Non vai limpar o piso na Casa Branca".

Redacción - 12:40 14/11/2008
A política de EUA en Oriente Próximo non semella que vaia mudar coa chegada de Obama

A política de EUA en Oriente Próximo non semella que vaia mudar coa chegada de Obama

Rahm Emanuel, un dos colaboradores principais de Barack Obama, viuse na obriga de pedir desculpas á comunidade árabe-estadounidense polas declaracións que o seu pai, de orixe xudía, fixo ao diario israelí Ma'ariv, segundo a información que recollen as axencias internacionais.

Benjamín Emanuel, ao se referir ao cargo que ha desempeñar o seu fillo -xefe de gabinete da Casa Branca-, afirmou: "Obviamente vai influír para que o presidente sexa pro-israelí. Por que non o ía facer? Que é, un árabe? Non vai limpar o piso na Casa Branca".

O Comité Árabe-Estadounidense contra a Discriminación enviou unha carta de protesta a Rahm Emanuel, con copia a Obama, na que lle pide que renegue publicamente deses comentarios. Así o fixo, e ademais ofreceu a posibilidade dunha xuntanza con esta asociación.

Segundo publica o xornal palestino The Electronic Intifada no seu editorial do 5 de novembro, Benjamin, axudou a pasar armas á Irgun (Etzel), a milicia sionista do ex-primeiro ministro israelí Menachem Begin que levou a cabo numerosos atentados terroristas en Palestina, algúns contra civís, incluído o do hotel King David de Xerusalén en 1946.

A designación de Rahm, tamén xudeu, non sentou nada ben no mundo árabe. As súas actuacións e declaracións nos últimos anos ao respecto do conflito en Palestina, estaban claramente orientadas a favorecer os intereses do Estado de Israel.

"Para os millóns de árabes que expresaron o seu xúbilo ante a gran vitoria de Obama, a designación (de Emanuel) púxolle fin a unha festa curta", escribía esta cuarta feira o comentarista Osama Al Sharif no xornal Arab News. No mesmo senso pronunciáronse a gran parte dos medios arábigos e doutros países de maioría musulmá.

Hillary Clinton, posíbel secretaria de Estado
Por outra banda, dous asesores de Obama informaron esta quinta feira que se contempla o nome da súa rival nas primarias do partido demócrata e senadora por Nova York, Hillary Clinton, como secretaria de Estado do futuro goberno estadounidense, segundo a canle de TV NBC News.

No entanto, outros demócratas como o senador John Kerry e o gobernador Bill Richardson tamén estarían interesados en substituír a Condoleezza Rice como ministra de Exteriores do país.


3.8/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: