Vieiros

Unha pregunta parlamentaria solicítalle ao Goberno que explique cal é a "situación real" do río Ulla e que poña en marcha medidas para frear os vertidos e "combater" a deterioración do seu percorrido.

A autora da pregunta, a parlamentaria do BNG Ana Pontón, lembra que o Ulla é o río máis importante sobre o que a Xunta ten competencias e chama a atención sobre o feito de que "é un dos que maiores impactos negativos presenta ao longo do seu percorrido". Como mostra diso, Pontón achega o suceso acontecido recentemente en Padrón ou a contaminación nos afluentes do Ulla, como o caso "alarmante" dos ríos Brandelos e Lañas.

No escrito lémbrase que un informe da Consellaría de Medio Ambiente emitido en 2008 detectou 509 puntos de vertido na zona e que se comprometeu a redactar e a executar un prorama específico de recuperación da bacía do río dentro do Plan de Control de Vertidos.

O BNG tamén se interesa polas estacións de control de calidade das augas do río e a avaliación que Medio Ambiente fai do seu estado, ademais das posíbeis actuacións de control e reparación de danos que teña previstas.