Vieiros

Vieiros de meu Perfil


Edición xeral

RSS de Edición xeral
TAXA ANALFABETISMO

Máis de 52 mil galegos non saben ler nin escribir

Uns 14.300 maiores de 18 anos retoman os seus estudos ao matricularse en clases de alfabetización, Secundaria, Bacharelato ou FP para adultos.

Redacción - 13:15 25/11/2008

A cifra de residentes no país maiores de 16 anos que non saben ler nin escribir ascende a 52.800 galegos, un 1,9% da poboación, segundo datos do Instituto Nacional de Estatística (INE) do terceiro trimestre deste ano. Esta taxa sitúase por baixo da media estatal, que chega até o 2,4%, onde a tendencia é ascendente, unhas cifras que se poden achacar fundamentalmente á chegada de inmigrantes, colectivo no que o analfabetismo é maior. Pola contra, en Galiza a tendencia é descendente: a taxa reduciuse unha terceira parte na última década, xa que nos primeiros anos dos 90 máis do 3% dos galegos non tiñan habilidades na lectura nin na escritura.

Ademais, en pouco máis de dez anos duplicouse a porcentaxe de poboación con estudos superiores, acadando o 15,11% do total en 2005 (en contraste, só sete de cada 100 galegos pasaba pola universidade en 1991 e só un de cada dez o facía en 1995). Doutra banda, ademais da cidadanía analfabeta, máis de dez de cada 100 persoas censadas en Galiza non teñen formación académica, é dicir, case un 14% dos galegos son analfabetos ou carecen de estudos básicos. Tamén é salientábel que a maioría dos analfabetos galegos teñen máis de 55 anos e que o xénero que máis sofre esta realidade é o das mulleres.

Programas de alfabetización
Este ano 14.300 galegos asisten ás clases de Educación para Adultos, que a Consellería imparte en 90 institutos e colexios de toda Galiza. Este tipo de ensino está pensando para aqueles que desexan obter unha nova titulación académica para optar a un determinado posto de traballo ou aqueles que non puideron finalizar os seus estudos. Esta estatística recolle, pois, a todos os alumnos que se matriculan tanto en clases de alfabetización, como Secundaria, Bacharelato ou Formación Profesional.

Se nos centramos nos datos dos que queren aprender a ler e escribir, matriculáronse 259 persoas. Son grupos reducidos, duns doce alumnos, que reciben clases para mellorar as súas nocións de lectura e escritura. Fundamentalmente soen ser xente maior de 50 anos e inmigrantes que teñen dificultades co idioma.


Ligazóns

5/5 (5 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: