Vieiros

Vieiros de meu Perfil


Edición xeral

RSS de Edición xeral
SEN LUZ NA MONTAÑA

Parche "electróxeno" malia as reiteradas deficiencias de subministro

Fronte aos déficits no servizo eléctrico, a idea de Industria é de momento pagarlles estes aparellos aos concellos máis illados para ir tirando nos casos máis graves.

Redacción - 12:30 03/12/2008

Logo de que diferentes concellos da montaña de Lugo quedasen illados por máis de tres días a causa do temporal de neve e frío, chega o momento de facer balance e de buscar solucións. O conselleiro de Innovación e Industria, Fernando Blanco, visitou Pedrafita do Cebreiro e comprometeuse a estudar a creación dunha liña de apoio para a adquisición no rural de grupos electróxenos que permitirían facer fronte á falta de subministración de electricidade en circunstancias coma as dos días pasados. Segundo explicou, este tipo de medidas servirán para que as vivendas illadas non queden sen electricidade, tal e como lles sucedeu a varios milleiros de clientes de Fenosa. En concreto, no concello de Pedrafita, 20 mil usuarios estiveron sen subministro eléctrico durante toda a fin de semana.

O Conselleiro xa adiantou que se asinará un convenio a comezos de 2009 con todos os concellos "susceptíbeis de sufrir estas situacións", para o que se realizará unha avaliación que determine cales poderían ser os municipios beneficiarios e cal sería a inversión necesaria. No Courel estiveron afectados estes días uns 16 abonados a Unión Fenosa. Con todo, Blanco eximiu de responsabilidades á empresa e subliñou que en Galiza hai uns 50 mil quilómetros de rede de cable atendidos por un único operador, co que "con condicións meteorolóxicas adversas é moi difícil traballar e dar unha resposta áxil". Deste xeito, destacou o "esforzo considerábel" da operadora, así como dos alcaldes e da consellaría. Con todo, tamén dixo en relación á rede eléctrica galega que "sempre se pode mellorar".


Ligazóns

4,5/5 (2 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: