Vieiros

Un proxecto europeo de e-learning coordinado pola USC, Efelcren, presentouse esta semana en Madrid na Feira de Valorización de Produtos Europeos sobre Competencias Básicas, organizado polo OAPEE. O equipo compostelán foi seleccionado como exemplo de boa práctica neste encontro.

Efelcren crea e valida materiais didácticos mediante ferramentas gratuítas ou de software libre, que despois se empregarán en centros de formación de Primaria ou Secundaria. O traballo está cofinanciado polo programa Sócrates/Comenius 2.1 da Comisión Europea.

Nunha primeira fase, o proxecto reuniu investigadores, formadores de profesores, profesores, técnicos e estudantes de TIC para identificar as mellores estratexias de ensino e crear e avaliar materiais de ensino electrónico con contido interactivo. Estes contidos atópanse no Centro de Recursos. Tamén pode colaborar calquera persoa, achegando materiais propios de ensino dixital, ligazóns de interese ou ferramentas útiles, nunha  actualización constante.

Colaboran como socios do proxecto o Cesga, o Trinity College de Irlanda, o Centre of Information Technology of Education de Lituania, o Istituto per le Tecnologie Didattiche de Italia, o Haslev Seminarium de Dinamarca e a Euneos Corporation de Finlandia.