Vieiros

Vieiros de meu Perfil


Irlanda

Edición xestionada por María Golpe
RSS de Irlanda
Acordo coa UE

Ou 'Si' ou 'Si': Irlanda volverá votar en referendo o Tratado de Lisboa

O goberno consegue en troques que cada país conserve un comisario nos futuros executivos comunitarios, en contra do estabelecido.

F. A. - 11:00 12/12/2008
Campaña polo 'Si' e polo 'Non' / Foto: María Golpe

Campaña polo 'Si' e polo 'Non' / Foto: María Golpe


Irlanda comprometeuse esta quinta feira a someter máis unha vez a referendo o Tratado de Lisboa antes da fin do actual mandato da Comisión Europea, en novembro do 2009. En troques, o Executivo irlandés recibiu garantías de que cada país conservará un comisario nos futuros executivos comunitarios, en contra do estipulado polo actual tratado e mais polo de Lisboa.

Ao respecto, o primeiro ministro de Irlanda, Brian Cowen, subliñou que o mantemento dun comisario por Estado é un elemento indispensábel que lles dá "seguridade e confianza" aos pequenos países. Unha cuestión que apoian tamén os Estados belga e holandés, e que rexeitan outros como o español.

Os 27 fixáronse como obxectivo que o novo texto, ratificado xa por 25 países agás Irlanda e República Checa, entre en vigor antes de rematar 2009. A reforma da Unión Europea estase a abordar estes días en Bruxelas polos xefes de Estado e de Goberno nunha cimeira.

Con este pacto queren abrir unha vía para poder resolver a crise política creada polo rexeitamento do pobo irlandés ao tratado nunha primeira consulta popular organizada en xuño. Porén, fontes diplomáticas recoñecen que o resultado podería volver ser de novo negativo debido á baixa popularidade do actual goberno.


5/5 (5 votos)

Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: