Vieiros

Vieiros de meu Perfil


Edición xeral

RSS de Edición xeral
25 anos de traballo

Anovar, aprender, galeguizar: a prol doutra escola para o país

Nova Escola Galega cítase este sábado para celebrar o 25 aniversario do colectivo, nado en favor da renovación pedagóxica e e a galeguización nas aulas.

Redacción - 09:30 13/12/2008

"Pensa a consellaría que a publicación dun decreto serve para cambiar automaticamente a realidade?". Así llo lembraba hai poucos meses o colectivo Nova Escola Galega (NEG) ao departamento de Educación da Xunta, ao respecto do decreto sobre o galego no ensino. Un decreto que, en opinión de NEG, estaba quedando "apenas nun papel".

Precisamente, de traballar a pé das aulas para mudar a realidade e tamén de xeito concreto en favor da nosa lingua, saben ben as persoas que durante 25 anos contribuíron a manter vivo este movemento de renovación pedagóxica, Nova Escola Galega. A iniciativa cumpre este 2008 os seus 25 anos de historia, unha longa traxectoria a prol da transformación e mellora do ensino.

O acto de conmemoración celébrase este sábado no Museo do Pobo Galego. Haberá unha mesa de debate baixo o título "Os Movementos de Renovación Pedagóxica (MRP): o seu papel na actualidade e prospectiva", moderada por María Dolores Candedo Gunturiz, vicepresidenta de Nova Escola, e que contará coa participación de Ricard Aymerich, presidente da Confederación Estatal de MRP, César Trapiello, en nome do MECEP-FICEM, Rui Trindade, do Movimento da Escola Moderna Portuguesa, e Xoán Costa, presidente da ASPG. Deseguido nomearanse como socios de honra a Rosa Liñares, Valentín Arias, María Luísa De la Torre, Xesús Alonso Montero, Cristina Álvarez Rodríguez e Xoán Babarro. O acto inclúe tamén a lectura do manifesto dos 25 anos de NEG e a presentación de varias publicacións. Clausura a xornada Xosé Lastra, actual presidente do colectivo, acompañado polas persoas que exerceron a presidencia anteriormente.

Un esforzo que une mestres en todo o país
Nova Escola Galega naceu en 1983 xuntando as forzas de diversos grupos que desde finais dos anos 70 traballaban no impulso da renovación didáctica e a galeguización do ensino. Escola Aberta, Avantar, o Movemento Cooperativo de Escola Popular Galega, Albe-Galicia, Xilbarbeira... As iniciativas confluíron en NEG, que sumou profesorado de todos os ciclos e en toda Galiza en favor da promoción de iniciativas para a defensa e construción do modelo de escola pública, a apertura permanente a "formulacións renovadoras tanto psicopedagóxicas coma didácticas" e a implicación no impulso á galeguización lingüística e curricular no ensino.

Nestes vintecinco anos a vizosa traxectoria deixou pegada en forma de materiais e proxectos diversos nos campos das didácticas da lingua, das ciencias sociais, das ciencias naturais e das matemáticas, á educación física, á psicomotricidade, os medios audiovisuais, a orientación escolar, a escola rural, a normalización lingüística, a historia da educación en Galiza, a educación plástica, a literatura infantil e xuvenil e a educación para paz.


4,33/5 (12 votos)


Sen comentarios

Novo comentario

É preciso que te rexistres para poder participar en Vieiros. Desde a páxina de entrada podes crear o teu Vieiros.

Se xa tes o teu nome en Vieiros, podes acceder dende aquí: